ທ່ານ ຄຳໃບ ດຳລັດ ກຳມະການສູນກາງພັກ ຮັກສາການປະທານ ສູນກາງແນວລາວສ້າງຊາດ ໄດ້ຖະແຫຼງຂ່າວຄວາມພ້ອມ ໃນການດຳເນີນກອງປະຊຸມໃຫຍ່ ຜູ້ແທນແນວລາວສ້າງຊາດທົ່ວປະເທດ ຄັ້ງທີ X ຕໍ່ສື່ ມວນຊົນ ເມື່ອວັນທີ 25 ພຶດສະພານີ້ ທີ່ສູນກາງແນວລາວສ້າງຊາດ ຊຶ່ງມີເນື້ອໃນບາງຕອນວ່າ: ຜ່ານການກະກຽມດ້ານຕ່າງໆ ມາຮອດເວລານີ້ ພວກເຮົາມີຄວາມພ້ອມໃນທຸກດ້ານ ທີ່ຈະດຳເນີນກອງປະຊຸມ ໃຫຍ່ ຜູ້ແທນແນວລາວສ້າງຊາດທົ່ວປະເທດ ຄັ້ງທີ X, ກອງປະຊຸມໃຫຍ່ດັ່ງກ່າວ ຈະດຳເນີນໃນຕົ້ນເດືອນມິຖຸນາ 2016 ນີ້ ຢູ່ນະຄອນຫຼວງວຽງຈັນ, ມີຜູ້ແທນສົມບູນ ແລະ ແຂກຖືກເຊີນ 442 ທ່ານ, ໃນນີ້ ມີຜູ້ແທນສົມບູນ 289 ທ່ານ, ພຣະສົງ 15 ອົງ ແລະ ຍິງ 48 ທ່ານ. ກອງປະຊຸມຄັ້ງນີ້ ດຳເນີນພາຍໃຕ້ຄຳຂວັນ: “ເພີ່ມທະວີຄວາມ ສາມັກຄີປອງດອງ ທົ່ວປວງຊົນລາວທັງຊາດ, ປຸກລະດົມທົ່ວສັງຄົມ ແຂ່ງຂັນຮັກຊາດ ແລະ ພັດທະນາ ເພື່ອຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ X ຂອງພັກ ແລະ ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ VIII, ສືບຕໍ່ບຸກທະລຸທັງ 4 ດ້ານ ເພື່ອຍົກສູງບົດບາດ ແລະ ຄຸນນະພາບການເຄື່ອນ ໄຫວຂອງ ແນວລາວສ້າງຊາດ”.
ກອງປະຊຸມຈະໄດ້ຄົ້ນຄວ້າພິຈາລະນາ ບັນດາວຽກງານ ແລະ ບັນຫາສຳຄັນຈຳນວນໜຶ່ງ ທັງສະເພາະໜ້າ ແລະ ຍາວນານຄື:
1. ກອງປະຊຸມໃຫຍ່ ຈະໄດ້ທົບທວນຄືນຜົນການຈັດຕັ້ງປະຕິບັດ ມະຕິກອງປະຊຸມໃຫຍ່ ຜູ້ແທນແນວລາວສ້າງຊາດ ທົ່ວປະເທດ ຄັ້ງທີ IX, ໃນນີ້ ຈະໄດ້ສັງເກດຕີລາຄາຈຸດດີ, ຈຸດອ່ອນ ແລະ ຂໍ້ຄົງຄ້າງ, ສາເຫດ ແລະ ບົດຮຽນທີ່ຖອດ ຖອນໄດ້ຈຳນວນໜຶ່ງທີ່ສຳຄັນ,
2. ກອງປະຊຸມໃຫຍ່ ຈະໄດ້ຮັບຮອງເອົາ ທິດທາງວຽກງານຕົ້ນຕໍຂອງ ຄະນະກຳມະການສູນກາງແນວລາວສ້າງຊາດ ແຕ່ນີ້ຮອດປີ 2020, ຍຸດທະສາດການພັດທະນາຮອດ ປີ 2025 ແລະ ວິໄສທັດຂອງວຽກງານ ແນວລາວສ້າງຊາດ ຮອດປີ 2030.
3. ກອງປະຊຸມໃຫຍ່ ຈະຮັບເອົາກົດລະບຽບສະບັບປັບປຸງໃໝ່ ສະໄໝທີ X ຂອງແນວລາວສ້າງຊາດ.
4. ກອງປະຊຸມ ຈະໄດ້ຮັບຮອງເອົາການສະເໜີແຕ່ງຕັ້ງປະທານ, ບັນດາທ່ານຮອງປະທານ ແລະ ຄະນະກຳມະ ການສູນກາງແນວລາວສ້າງຊາດ ສະໄໝທີ X ເພື່ອສືບຕໍ່ນຳພາຈັດຕັ້ງປະຕິບັດ ວຽກງານແນວລາວສ້າງຊາດ ໃນໄລຍະ 5 ປີຕໍ່ໜ້ານີ້.
ແຫລ່ງຂ່າວ:
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!