ສຳນັກຂ່າວຕ່າງປະເທດ ລາຍງານໃນວັນທີ 26 ພຶດສະພານີ້ວ່າ ທ່ານ ອະເລັກຊານເດີ ໂນວັກ (Alexander Novac) ລັດຖະມົນຕີກະຊວງອຸດສາຫະກຳຣັດເຊຍ ໄດ້ໃຫ້ສຳພາດຜ່ານ ສະຖານີໂທລະພາບ Rossiya 24 ຂອງຣັດເຊຍ ໃນທ້າຍອາທິດຜ່ານມາວ່າ ຣັດເຊຍກຳລັງສຶກສາໂອກາດ ທີ່ຈະເຂົ້າຮ່ວມລົງທຶນ ໃນໂຄງການກໍ່ສ້າງ ໂຮງກັ່ນນ້ຳມັນໃນປະເທດລາວ ແລະ ໂຄງການທໍ່ສົ່ງນ້ຳມັນ ລາວ-ຫວຽດນາມ ເພື່ອສົ່ງຜະລິດຕະພັນນ້ຳມັນ ໄປຍັງຫວຽດນາມ ແລະ ໃນຂະນະດຽວກັນ ກໍຈະສົ່ງອາຍແກັສຈາກຫວຽດນາມ ເຂົ້າມາຍັງປະເທດລາວ ໂດຍໂຄງການດັ່ງກ່າວນີ້ ໄດ້ຖືກຫາລືກັນໃນໄລຍະ ກອງປະຊຸມສຸດຍອດອາຊຽນ-ຣັດເຊຍ ທີ່ຈັດຂຶ້ນໃນເມືອງໂຊຈິ ສະຫະພັນຣັດເຊຍ ເມື່ອບໍ່ດົນມານີ້.
ແຫລ່ງຂ່າວໄດ້ລະບຸວ່າ ປັດຈຸບັນ ບໍລິສັດ Gazprom Neft ຊຶ່ງເປັນກຸ່ມບໍລິສັດສຳຫລວດ ແລະ ຜະລິດນ້ຳມັນຂະໜາດໃຫຍ່ຂອງຣັດເຊຍ ກຳລັງພິຈາລະນາກ່ຽວກັບເງື່ອນໄຂການຮ່ວມທຶນ ສຳລັບໂຄງການດັ່ງກ່າວນີ້, ແນວໃດກໍຕາມ ຍັງບໍ່ທັນມີການເປີດເຜີຍລາຍລະອຽດ ກ່ຽວກັບ ທີ່ຕັ້ງຂອງໂຄງການດັ່ງກ່າວ ຕະຫລອດຮອດມູນຄ່າການລົງທຶນ ແລະ ຕົວເລກຄາດໝາຍທາງເສດຖະກິດໃດໆເທື່ອ.
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!