ອ່ານຕໍ່ຈາກສະບັບກ່ອນ

ໂຕ້ໄດ້ຍົກມືຂຶ້ນແລ້ວຕອບຕຸ່ນໄປແບບນ້ຳສຽງທຳມະດາວ່າ: ບໍ່ເປັນຫຍັງ! ບໍ່ເປັນຫຍັງ ທັງທີ່ໃນໃຈມັນຮ້ອນປານໄຟ

ແລະການແຂ່ງຂັນກໍ່ມາຮອດວັນສຸດທ້າຍທຸກທີມກໍ່ໄດ້ສະແດງຄວາມສາມາດຢ່າງເຕັມທີ່ແຕ່ທຸກຢ່າງມັນກໍ່ຕ້ອງມີແພ້ມີຊະນະ ຫ້ອງ 6/1 ກີລາເຕະບານສາມາດຍາດໄດ້ທີ 1 ມາຄອງ, ກີລາບານບ້ວງຍາດໄດ້ທີ 2, ກີລາເຕະຕໍ້ຍາດໄດ້ທີ 3, ກີລາບານຕີຕົກຮອບ, ສະແດງລະຄອນຕົກຮອບ, ຟ້ອນໄດ້ທີ 3

ໃນຕອນແລງວັນເສົາອາຈານປະຈຳຫ້ອງໄດ້ພາທຸກຄົນໃນຫ້ອງໄປລ້ຽງທີ່ຮ້ານຊີ້ນດາດໃກ້ໂຮງຮຽນ ທຸກຄົນກໍ່ພາກັນໄປກິນດ້ວຍຄວາມມ່ວນຊື່ນ ເພື່ອສະຫຼອງກັບໄຊຊະນະທີ່ໄດ້ຮັບ ເປົາເອງກໍ່ຄວງແຂນດ້າໄປຮ່ວມງານນຳ ໃນຂະນະກິນຢູ່ນັ້ນເປົາພະຍາຍາມເຮັດສະຫວີດຫວານກັບດ້າ ເພ່ື່ອຈະໃຫ້ຕຸ່ນໂມໂຫ ທີ່ຈິງຕຸ່ນກໍ່ຮູ້ສຶກເຈັບໃນໃຈຈີ໊ດໆເລັກໜ້ອຍ ແຕ່ບໍ່ສະແດງອາການ ແລະ ຕຸ່ນກໍ່ໄດ້ເຮັດຕອບຄືນດ້ວຍການເອົາໃຈໃສ່ໂຕ້ສາລະພັດປານຄົນເປັນແຟນກັນແທ້ ຈົນໝູ່ໃນຫ້ອງໃຜກໍ່ພາກັນຄິດວ່າຕຸ່ນກັບໂຕ້ເປັນແຟນກັນແທ້ ສ່ວນໂຕ້ກໍ່ຮູ້ໃນໃຈວ່ານີ້ເປັນພຽງການສະແດງແຕ່ລາວກໍ່ຍິນດີຮັບການກະທຳຈາກຕຸ່ນໂດຍບໍ່ຂັດຂືນເລີຍ ເພາະໂຕ້ຮູ້ສຶກມີຄວາມສຸກຈົນບໍ່ຢາກໃຫ້ຮອດວັນໝົດກຳນົດ

ຮອດເວລາ 22:00ໂມງ ພວກເຂົາໄດ້ພາກັນເລີກກິນລ້ຽງໂຕ້ໄດ້ຂັບລົດໄປສົ່ງຕຸ່ນທີ່ເຮືອນ ທີ່ໜ້າບ້ານກ່ອນທີ່ໂຕ້ຈະກັບຕຸ່ນໄດ້ກ່າວຄຳຂອບໃຈ ແລະ ບອກລັບຝັນດີ ເຊິ່ງໂຕ້ກໍ່ບອກລັບຝັນດີຕຸ່ນຄືນ ໃນເວລາທີ່ໂຕ້ຂັບລົດຈັກເທນ້າຕາເພັດ ກັບເຮືອນລາວຮູ້ສຶກມີຄວາມສຸກ ແລະ ຍີ້ມໄປສຸດທາງ

ເມື່ອເຂົ້າຫ້ອງນອນໂຕ້ໄປຈັບເອົາອາລະບ້ຳຮູບທີ່ຕົນໄດ້ຖ່າຍມື້ວັນງານທີ່ໄປລ້າງມາແລ້ວຂຶ້ນມາເບິ່ງ ມີຮູບຕອນທີ່ຕຸ່ນກຳລັງຟ້ອນ, ຮູບຖ່າຍຕອນເດີນຂະບວນ ແລະ ຮູບທີ່ຕົນ ແລະ ເພື່ອນໆຖ່າຍຮ່ວມກັນ ພ້ອມທັງມີຮູບຖ່າຍຄູ່ລະຫວ່າງຕົນກັບຕຸ່ນພຽງສອງຄົນ ທັງເບິ່ງທັງຍິ້ມ ແລະ ລາວກໍ່ລັກຈູບຮູບຕຸ່ນເບົາໆກ່ອນຈະນອນລັບຝັນດີ

ສ່ວນຕຸ່ນເມືອເຂົ້າຫ້ອງນອນລາວໄດ້ແນມໄປທີ່ຕຸກກະຕາໝາທີ່ເປົາຊື້ໃຫ້ ຕຸ່ນໄດ້ຈັບຕຸກກະຕາຂຶ້ນມາກອດໄວ້ດ້ວຍຫົວໃຈທີ່ແຜ່ວໆ ແລະ ຄິດເຫັນໜ້າເປົາໃນເວລາດູແລດ້າ ແລະ ຄິດເຫັນເວລາທີ່ເປົາດູແລຕົວເອງ ຕຸ່ນຄິດວ່າຄວາມສຸກເຫຼົ່ານັ້ນມັນຄົງບໍ່ກັບມາຫາລາວອີກແລ້ວ ຕຸ່ນໄດ້ຖອນຫາຍໃຈ ແລ້ວລົ້ມຕົວນອນກອດຕຸກກະຕາໄວ້ແໜ້ນ.

ບ່າຍວັນຈັນທີ່ໂຮງຮຽນໃນຊົ່ວໂມງເລີກເມືອ ວັນນີ້ໂຕ້ບໍ່ກັບເມືອກິນເຂົ້າສວາຍຢູ່ເຮືອນເໝືອນທຸກວັນ ລາວໄດ້ຊວນຕຸ່ນໄປກິນເຂົ້າປຽກທີ່ຮ້ານອາຫານໃນໂຮງຮຽນທັງກິນທັງລົມກັນໄປ ແລະ ໂຕ້ໄດ້ເອີ່ຍປາກຊວນຕຸ່ນໄປເຮືອນໃນຕອນແລງມື້ນີ້ເຊິ່ງເປັນວັນເກີດອ້າຍລາວ ແລະ ຕຸ່ນກໍ່ຮັບປາກວ່າຈະໄປ ເມື່ອຮອດຕອນແລງຫຼັງຈາກຕຸ່ນທີ່ຕຸ່ນ ນິ້ງເຂົ້າອາບນ້ຳປ່ຽນເຄື່ອງແລ້ວ ຕຸ່ນກໍ່ຄອບແມ່ອອກໄປ ລາວໄດ້ໄປທີ່ຮ້ານເຄັກ ແລະ ເລືອກຊື້ເຄັກກ້ອນໜຶ່ງໄປເປັນຂອງຂັວນວັນເກີດໃຫ້ອ້າຍຂອງໂຕ້ ເມື່ອຕຸ່ນໄປຮອດເຮືອນໂຕ້ ທີ່ໜ້າບ້ານໝາໂຕ້ໄດ້ເຫົ່າຂຶ້ນ ເມື່ອໂຕ້ໄດ້ຍິນສຽງໝາເຫົ່າລາວກໍ່ຄິດວ່າຕອງແມ່ນຕຸ່ນມາຮອດແລ້ວ ໂຕ້ໄດ້ຟ້າວອອກມາຮັບເອົາ ແລະ ພາຕຸ້ນຍ່າງເຂົ້າໄປໃນເຮືອນ ຕຸ່ນໄດ້ໄປສະບາຍດີພໍ່-ແມ່ ແລະ ອ້າຍຂອງໂຕ້ ທີ່ນັ່ງຢູ່ໃນເຮືອນ ຕຸ່ນໄດ້ເອົາເຄັກໃຫ້ໂຕ້ເອົາໄປໄວ້ໃນຕູ້ເຢັນຈາກນັ້ນຕຸ້ນກໍ່ຍ່າງເຂົ້າໄປໃນເຮືອຄົວພ້ອມໂຕ້ ທຳອິດລາວຄິດວ່າວັນເກີດຄືມາມິດງຽບແທ້ ແຕ່ທີ່ຈິງຄົນມາໂຮມກັນຢູ່ເຮືອນຄົວໝົດ ພວກເຂົາກຳລັງພາກັນເຮັດກິນ ຕຸ່ນກໍ່ບໍ່ລໍຊ້າຟ້າວເຂົ້າໄປຊ່ວຍເຮັດກິນທັນທີ ແລະ ລົມກັບທຸກຄົນຢ່າງເປັນມິດ ແລະ ບໍ່ມີທ່າທີເຂີນອາຍ ເຮັດໃຫ້ທຸກຄົນເຂົ້າກັບຕຸ່ນໄດ້ດີ ອາຫານວັນນີ້ມີປີ້ງບາບີຄິວ, ຢຳຍໍ່, ເຂົ້າພັດ, ຈີນລູກຊີ້ນ, ປີ້ງຕິນໄກ່ ບາງຄົນກໍ່ພາກັນໄປຈັດໂຕະ ແລະ ຕິດເຕົາປີ້ງບາບີຄິວທີ່ໜ້າບ້ານ ໃນຂະນະທີ່ໂຕ້ກຳລັງຕິດເຕົາຢູ່ນັ້ນ ຕ້ອມອ້າຍຂອງໂຕ້ກໍ່ຍ່າງມາໃກ້ໆແລ້ວຖາມ

ຕ້ອມ: ຄົນນີ້ບໍແມ່ນຜູ້ສາວໂຕ

ໂຕ້ຍິ້ມແລະ ຕອບແບບອາຍໆ: ບໍ່ແມ່ນ! ຄົນນີ້ໝູ່ເຮົາ

ຕ້ອມ: ແມ່ນບໍ້! ຄິດວ່າແມ່ນນ້ອງໄພ້ຊັ້ນດອກ

ໂຕ້ຫົວຂຶ້ນ: 555! ລາວບໍ່ແນມເຮົາດອກອ້າຍຕ້ອມ! ຟ້າວຈັດໂຕະເທາະເຈົ້າຫັ້ນດຽວສິນານແລ້ວ

ເມື່ອພວກບັນດາແມ່ຍິງເຮັດກິນແລ້ວພວກຜູ້ຊາຍກໍ່ພາກັນໄປຍົກອອກມາຈາກເຮືອນຄົວ ແລ້ວຕຸ່ນກໍ່ຮັບຜິດຊອບປິ້ງບາບີຄິວໃຫ້ທຸກຄົນໄດ້ກິນ ລາວທັງກິນທັງປິ້ງ ແລະ ໂຕ້ກໍ່ມາປິ້ງຊ່ວຍກັນ ຈົນຮອດເວລາ 21:00ໂມງ ໄດ້ຮອດເວລາເປົ່າເຄັກ ຕຸ່ນກໍ່ໄດ້ໄປຮ່ວມຢືນຮ້ອງເພງ ແລະ ໂຕ້ກໍ່ມາຢືນຂ້າງໆຕຸ່ນ ພວກເຂົາຢືນໃກ້ກັນ ໂຕ້ຮູ້ສຶກໃຈເຕັ້ນຕຶກໆເມື່ອເວລາທີ່ຕົນເອງໄດ້ຢືນຕິດກັບຕຸ່ນ ໂຕ້ໄດ້ລັກຍິ້ມເລັກໜ້ອຍ ຫຼັງຈາກຕັດເຄັກກິນເຂົ້າແລ້ວພວກເຂົາກໍ່ພາກັນດີດກີຕ້າຮ້ອງເພງຢ່າງມ່ວນຊື່ນເວລາໄດ້ຜ່ານໄປຈົນຮອດ 22:30ໂມງ ຕຸ່ນກໍ່ຄອບເມືອເພາະມັນເດິກຫຼາຍແລ້ວ ແລະ ໂຕ້ກໍ່ຂັບລົດເມືອສົ່ງທີ່ເຮືອນ ແລະ ກໍ່ເຊັ່ນເຄີຍທີ່ຕຸ່ນຕ້ອງເອີ່ຍຄຳຂອບໃຈ ແລະ ບອກລັບຝັນດີກັບໂຕ້ ກ່ອນໂຕ້ຈະຂັບລົດເມືອເຮືອນ

ອ່ານຕໍ່ສະບັບຕໍ່ໄປ

ແຕ່ງໂດຍ: ປັອກເລັກ ລາວໂພສຕ໌