ທີມນັກກີລາອົດສະຕຣາລີໃນການແຂ່ງຂັນກີລາໂອລິມປິກທີ່ນະຄອນຣີໂອເດຈາເນໂຣຂອງບຣາຊິນຈະໄດ້ຮັບແຈກຖົງຢາງອະນາໄມ ຊຶ່ງບໍລິສັດຜູ້ຜະລິດຮັບປະກັນວ່າສາມາດປ້ອງກັນເຊື້ອໄວຣັສຊິກາໄດ້ເກືອບທັງໝົດ.
ຄະນະກຳມະການໂອລິມປິກອົດສະຕຣາລີ ຖະແຫຼງເຖິງມາດຕະຖານດ້ານສາທາລະນະສຸກໃນການແຂ່ງຂັນກີລາໂອລິມປິກລະຫວ່າງວັນທີ 5-21 ສິງຫານີ້ ຊຶ່ງທີມນັກກີລາອົດສະຕຣາລີຈະໄດ້ຮັບແຈກຖົງຢາງອະນາໄມ ຊຶ່ງເປັນແນວທາງໜຶ່ງໃນການປ້ອງກັນບັນຫາທີ່ອາດຈະເກີດຂຶ້ນໃນລະຫວ່າງການເຂົ້າຮ່ວມການແຂ່ງຂັນກີລາທີ່ຣີໂອ, ບໍລິສັດສະຕາຟາມາໂຮນດິ້ງ ແລະບໍລິສັດແອນເຊລ ເປັນຜູ້ຜະລິດຖົງຢາງອະນາໄມແບບພິເສດທີ່ສາມາດປ້ອງກັນການຕິດເຊື້ອທົ່ວໄປ ແລະ ຍັງມີສານຕໍ່ຕ້ານເຊື້ອໄວຣັສທີ່ສາມາດຕິດຕໍ່ທາງເພດສຳພັນ ທັງນີ້ ໄວຣັສຊິກາ ຊຶ່ງມີຍຸງເປັນພາຫະກຳລັງລະບາດໃນອາເມລິກາກາງ ແລະ ລາຕິນອາເມລິກາ ຊຶ່ງອົງການອະນາໄມໂລກປະກາດພະວະເລັ່ງດ່ວນດ້ານສາທາລະນະສຸກໂລກ.