ຂປລ. ​ເມື່ອ​ບໍ່​ດົນ​ມາ​ນີ້, ພະ​ແນກ​ແຮງ​ງານ​ ແລະ ສະ​ຫວັດ​ດີ​ການສັງ​ຄົມ​ ແຂວງບໍ່​ແກ້ວ​ ຮ່ວມ​ກັບ​ຫ້ອງ​ການ​ແຮງ​ງານ​ ແລະ ສະ​ຫວັດ​ດີ​ການສັງ​ຄົມ ​ເມືອງຜາ​ອຸ​ດົມ​ ໄດ້​ຈັດ​ພິ​ທີ​ມອບ-​ຮັບ​ເງິນ​ ນະ​ໂຍ​ບາຍ​ອຸດ​ໜູນ​ ໃຫ້​ແກ່​ຍາດ​ຕິ​ພີ່​ນ້ອງ ຜູ້​ທີ່​ເສຍ​ສະຫລະ​ຊິ​ວິດ​ໃນ​ປາງ​ສົງ​ຄາມ ແລະ ຜູ້​ທີ່​ອອກ​ການ​ປະ​ຕິ​ວັດ​ ກ່ອນ​ປີ 1975 ​ທີ່​ມີ​ຄຸນ​ງາມ​ຄວາມ​ດີ​ ໃນການ​ປະ​ກອບ​ເຂົ້າ​ ໃນ​ພາ​ລະ​ກິດປະ​ຕິ​ວັດ​ຊາດ.

ເງິນທີ່​ນຳ​ມາ​ມອບ​ໃນ​ຄັ້ງ​ນີ້​ ມີ​ທັງ​ໝົດ​ 936 ​ລ້ານກວ່າກີບ ​ໂດຍ​ແມ່ນ​ ທ່ານ ຈອມ​ສີ ລັດ​ຕະ​ນະ​ປັນ ຮອງ​ເຈົ້າ​ເມືອງຜາ​ອຸ​ດົມ ​ເປັນ​ຜູ້ມອບ​ໃຫ້​ຍາດ​ພີ່ນ້ອງ ຜູ້​ທີ່​ໄດ້​ເສຍ​ສະຫລະ​ຊິ​ວິດ​ໃນ​ປາ​ສົງ​ຄາມ​ ແຕ່​ປີ 1955-1965 ມີ 19 ຄົນ, ຍິງ 2 ຄົນ ເປັນ​ຈຳ​ນວນ​ເງິນ 417​ ລ້ານ​ກວ່າກີບ, ແຕ່​ປີ 1966-1975 ມີ 13 ຄົນ ເປັນ​ເງິນ 295 ລ້ານກວ່າກີບ, ຜູ້​ໄດ້​ຮັບ​ເງິນ​ອຸດ​ໜຸນເທື່ອດຽວ​ ທີ່​ອອກ​ການ​ປະ​ຕິ​ວັດ​ແຕ່​ປີ 1966-1975 ​ທີ່​ຍັງ​ມີຊີ​ວິດ ຈຳນວນ 19 ຄົນ ​​ເປັນ​ເງິນ 223 ລ້ານກວ່າກີບ​.

ໃນ​ວັນ​ດຽວ​ກັນ, ພະ​ແນກ​ແຮງ​ງານ​ ແລະ ສະ​ຫວັດ​ດີ​ການສັງ​ຄົມ ​ແຂວງບໍ່​ແກ້ວ ຍັງໄດ້​ສືບ​ຕໍ່ມອບ​ເງິນ​ນະ​ໂຍ​ບາຍ​ອຸດ​ໜູນ ຢູ່​ເມືອງ​ປາກ​ທາ ໃຫ້​ແກ່​ຍາດ​ຕິ​ພີ​ນ້ອງ ທີ່​ໄດ້​ເສຍ​ສະຫລະ​ຊິ​ວິດ​ ໃນ​ປາ​ງສົງ​ຄາມຈຳ​ນວນ 4 ຄົນ ເປັນ​​ເງິນ 80 ລ້ານ​ກີບ ​ເຊັ່ນ​ດຽວ​ກັນ.

ແຫລ່ງຂ່າວ:

ສຳຫຼັບທ່ານທີ່ຮັກສຸຂະພາບ ຕິດຕາມເລື່ອງດີດີ ກົດໄລຄ໌ເລີຍ!