ເມື່ອວັນທີ 4 ພຶດສະພາຜ່ານມາພະແນກອຸດສາຫະກຳ ແລະ ການຄ້ານະຄອນຫຼວງວຽງຈັນ, ໄດ້ຖະແຫຼງຂ່າວທີ່ສູນການຄ້າລາວໄອເຕັກກ່ຽວກັບການຈະຈັດງານວາງສະແດງ ແລະ ຈຳໜ່າຍສິນຄ້າໜຶ່ງເມືອງໜຶ່ງຜະລິດຕະພັນ ແລະ ສິນຄ້າຄອບຄົວຕົວແບບຄັ້ງທີ III, ໂດຍເປັນປະທານຂອງ ທ່ານ ເບີລິນ ເພັດຈັນທະລາດ ຫົວໜ້າພະແນກອຸດສາຫະກຳ ແລະການຄ້ານະຄອນຫຼວງວຽງຈັນ, ພ້ອມນີ້ກໍມີພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ເບີລິນ ເພັດຈັນທະລາດ ໄດ້ກ່າວວ່າ: ຈຸດປະສົງການຈັດງານກໍເພື່ອຈັດຕັ້ງປະຕິບັດນະໂຍບາຍໃນການສົ່ງເສີມການຜະລິດເປັນສິນຄ້າ ແລະການໂຄສະນາສິນຄ້າໃຫ້ແກ່ບັນດາຫົວໜ່ວຍທຸລະກິດຂະໜາດນ້ອຍ ແລະກາງທົ່ວປະເທດເວົ້າສະເພາະທີ່ຢູ່ພາຍໃນນະຄອນຫຼວງວຽງຈັນໃຫ້ມີຕະໜ່າງຮອງຮັບຜະລິດຕະພັນພາຍໃນ ແລະ ເສີມສ້າງທ່າແຮງໃຫ້ແກ່ສິນຄ້າໜຶ່ງເມືອງໜຶ່ງຜະລິດຕະພັນທີ່ໄດ້ຖືກຄັດເລືອກໃຫ້ ເປັນສິນຄ້າກາໝາຍໂອດ໊ອບ ຂອງນະຄອນຫຼວງວຽງຈັນກໍຄືໃນທົ່ວປະເທດໃຫ້ມີພື້ນຖານໂຄງລ່າງໃນການເປີດຕະຫຼາດຈຳໜ່າຍຜະລິດຕະພັນຂອງຕົນເອງ.
ໃນນັ້ນ ກໍເພື່ອສ້າງຄວາມເຂັ້ມແຂງໃຫ້ຫົວໜ່ວຍທຸລະກິດທີ່ເຮັດການຜະລິດແລະສາມາດກ້າວເຂົ້າສູ່ຕະຫຼາດທັງພາຍໃນ ແລະ ເຊື່ອມໂຍງເຂົ້າຕະຫຼາດປະຊາຄົມເສດຖະກິດອາຊຽນ ຫຼື AEC ເທື່ອລະກ້າວ, ພ້ອມກັນນັ້ນຍັງສາມາດຊຸກຍູ້ໃຫ້ທຸລະກິດຄອບຄົວຕົວແບບມີຄວາມກະຕືລືລົ້ນໃນການຫັນເຂົ້າເປັນສິນຄ້າໂອດ໊ອບ, ເພື່ອເປັນການໂຄສະ ນາແລກປ່ຽນລະຫວ່າງນັກທຸລະກິດຜະລິດສິນຄ້າໂອດ໊ອບດ້ວຍກັນໃນທົ່ວປະເທດ.
ພິເສດໃນງານວາງສະແດງສິນຄ້າປີນີ້ ແມ່ນຈະມີງານປະກວດຜະລິດຕະພັນສິນຄ້າໂອດ໊ອບດີເດັ່ນ, ເປົ້າໝາຍໃນ ການເຂົ້າຮ່ວມງານລວມມີທັງໝົດ 163 ຫົວໜ່ວຍ, ມີ 175 ຫ້ອງ ໂດຍງານຈະດຳເນີນເປັນເວລາ 6 ວັນ ແຕ່ພິທີເປີດງານຢ່າງເປັນທາງການແມ່ນຈະຈັດຂຶ້ນໃນຕອນບ່າຍຂອງວັນທີ 27 ພຶດສະພາ 2016 ທີ່ສູນການຄ້າລາວໄອເຕັກນະຄອນຫຼວງວຽງຈັນ.
ທີ່ມາ: 