ຂປລ. ໃນ​ປີ 2016 ​ໂດຍ​ສະ​ເພາະ​ໄລຍະ​​ເ​ເດືອນ​ເມສາ​ນີ້, ປະຊາຊົນ​ຫລາຍ​ທ້ອງ​ຖິ່ນ​ ໃນ​ຂອບ​ເຂດ​ທົ່ວ​ປະ​ເທດ ​ໄດ້​ຮັບ​ຜົນ​ກະທົບ​ ອັນ​ໄດ້​ສ້າງ​ຜົນ​ເສຍ​ຫາຍທາງ​ຊີວິດ ​ແລະ ຊັບສິນ​ຂອງ​ປະຊາຊົນ​ ເປັນ​ຈຳນວນ​ຫລວງ​ຫລາຍ. ມາ​ຮອດ​ປັດຈຸບັນ​ ຢູ່ບາງ​ທ້ອງ​ຖິ່ນ​ແມ່ນ​ໄດ້​ຮັບ​ການ​ຊ່ວຍ​ເຫລືອ​ ຈາກ​ອຳນາດ​ການ​ປົກຄອງ​ແລ້ວ ​ໃນ​ເບື້ອງ​ຕົ້ນ ​ແລະ ບາງ​ທ້ອງ​ຖິ່ນ​ ກຳລັງ​ດຳ​ເນີນ​ການຕິດຕາມ​ກວດກາ​ ປະ​ເມີນ​ຜົນ​ເສຍ​ຫາຍ.

​ຢູ່​​ເມືອງ​ຫລາ ​ແຂວງ​ອຸດົມ​ໄຊ ໃນ​ວັນ​ທີ 24 ​ເມສາ ໄດ້​ເກີດ​ມີ​ຝົນຕົກ ​ແລະ ລົມພັດ​ແຮງ ​ເຮັດ​ໃຫ້​ເຮືອນ​ຊານ​ ຂອງ​ປະຊາຊົນ ​ໄດ້​ຮັບ​ຜົນ​ກະທົບ 144 ຫລັງ, ​ເລົ້າ​ເຂົ້າ 10 ກວ່າ​ຫລັງ, ​ໂຮງຮຽນ 7 ​ແຫ່ງ, ຫ້ອງການ 1 ຫລັງ, ປະຊາຊົນ 15 ຄອບຄົວ ບໍ່​ມີ​ທີ່ຢູ່​ອາ​ໄສ, ​ເສັ້ນທາງ​ຫລາຍ​ສາຍ​ ຖືກ​ຕົ້ນ​ໄມ້​ຫັກ​ທັບ​ ​ເຮັດ​ໃຫ້ການ​ສັນຈອນ ​ໄປ-ມາ ພົບ​ຄວາມ​ຫຍຸ້ງຍາກ.

​ຢູ່​ເມືອງ​ຜາ​ອຸດົມ ​ແຂວງ​ບໍ່​ແກ້ວ ທີ່ ​ເກີດ​ມີ​ຝົນຕົກ-ລົມ​ພັດ​ແຮງ ​ໃນ​ວັນ​ທີ 22 ​ເມສາ ​ເຮັດ​ໃຫ້​ເຮືອນ​ຊານ​ ຂອງ​ປະຊາຊົນ​ ໄດ້​ຮັບ​ຜົນ​ເສຍ​ຫາຍ 284 ຫລັງ, ​ໃນ​ນັ້ນ​​ເສຍ​ຫາຍ​ໜັກ 8 ຫລັງ, ຕົ້ນ​ໄມ້​ອຸດສາຫະກຳ ​ແລະ ຕົ້ນ​ໄມ້​ກິນ​ໝາກ​ ໄດ້​ຮັບ​ຜົນ​ເສຍ​ຫາຍ. ລວມມູນ​ຄ່າ​ເສຍ​ຫາຍ​ປະມານ 20 ລ້ານ​ກວ່າ​ກີບ. ມາ​ໃນ​ວັນ​ທີ 25 ​ເມສາ ອຳນາດ​ການ​ປົກຄອງ​ແຂວງ, ​ເມືອງ ​ແລະ ພາກສ່ວນ ​ກ່ຽວຂ້ອງ ​ໄດ້​ລົງ​ຕິດຕາມ​ ໃຫ້ການ​ຊ່ວຍ​ເຫລືອ ຄອບຄົວ​ທີ່​ໄດ້​ຮັບ​ຜົນ​ກະທົບ ​ປະກອບ​ມີ ​ເຂົ້າສານ 2.500 ກວ່າ​ກິ​ໂລ, ​ເງິນ 150 ຕື້​ກີບ, ສາດ 150 ຜືນ ​ແລະ ອາຫານ​ແຫ້ງ ຈຳນວນ​ໜຶ່ງ. ປັດຈຸບັນ ປະຊາຊົນ​ທີ່​ໄດ້​ຮັບ​ຜົນ​ກະທົບ ​ແມ່ນ​ກຳລັງ​ສ້ອມ​ແປງ ​ເຮືອນ​​ຂອງ​ຕົນ​ ໃຫ້​ຄືນ​ສູ່​ສະພາບ​ເດີມ.

ສ່ວນ​ຢູ່​ບ້ານ​ປາງ​ຄຳ ​ເມືອງ​ປາກ​ລາຍ ​ແຂວງ​ໄຊ​ຍະ​ບູລີ ເວລາ 16:20​ ໂມງ ຫາ 18:40 ​ໂມງ ຂອງ​ວັນ​ທີ 21 ​ເມສາ ໄດ້ເກີດມີລົມ, ຝົນຕົກ​ ​ແລະ ມີໝາກເຫັບຕົກ ຕິດຕໍ່ຢ່າງແຮງອັນໄດ້ເຮັດໃຫ້ ເຮືອນຊານປະຊາຊົນ ເປ່ເພຫລາຍກວ່າ 160 ຄອບຄົວແລະອາຄານ ສະຖານທີ່ຕ່າງໆ ເຊັ່ນ: ຫໍປະຊຸມບ້ານ, ໂຮງຮຽນ, ສຸກສາລາ, ເສັ້ນທາງເຂົ້າບ້ານ ແມ່ນຖືກດິນເຊາະເຈື່ອນ, ສັດປີກເສຍຫາຍ 40 ກ່ວາໂຕ, ຈານດາວທຽມ 11 ຈານ, ກະເບື້ອງ 4.900 ແຜ່ນ, ສັງກະສີ 879 ແຜ່ນ, ​ເນື້ອ​ທີ່​ທຳ​ການ​ຜະລິດ​ ຖືກ​ດິນ​ຖົມ​ຫລາຍກວ່າ ສິບເຮັກຕາ. ຄາດ​ຄະ​ເນ​ ຜົນ​ເສຍ​ຫາຍ​ ເບື້ອງ​ຕົ້ນ 100 ລ້ານ​ກວ່າ​ກີບ.

​​ໃນ​ຂະນະ​ດຽວ​ກັນ, ຢູ່​ເທສະ​ບານ ​​ເມືອງ​ປາກ​ລາຍ ບໍ່ ​​ເກີດມີ​ພະຍຸ​ລະດູ​ຮ້ອນ ​ແຕ່ບໍ່​ມີ​ໄຟຟ້າ, ນ້ຳ​ປະປາ​ໃຊ້ ເປັນ​ເວລາ​ຕິດ​ຕໍ່ກັນ 4-5 ວັນ​ ​ເພາະ​ໄດ້​ຮັບ ​ຜົນ​ກະທົບ​ຈາກ​ ພາຍຸພັດ​ເຂົ້າ​ແຂວງ​ ໃກ້​ຄຽງ​ຂອງ ປະ​ເທດ​ເພື່ອນ​ບ້ານ ​ເນື່ອງ​ຈາກ​ວ່າ​ ຢູ່​ເທສະ​ບານ​ເມືອງ​ດັ່ງກ່າວ ​ໄດ້​ຊົມ​ໃຊ້​ໄຟຟ້າ ​ຈາກ​ປະ​ເທດ​ເພື່ອນ​ບ້ານ. ປັດຈຸບັນ ​ປະຊາຊົນ​ໄດ້​ຊົມ​ໃຊ້​ໄຟຟ້າ​ ເປັນ​ປົກ​ກະຕິ​ແລ້ວ.

​ສຳລັບ​ ຢູ່​ເຂດ​ເທສະ​ບານ ​ເມືອງ​ທ່າ​ແຂກ ​ໂດຍ​ສະ​ເພາະ ​ພັກເຊົາຂອງພະສົງ ແລະ ບ່ອນສະກະລະບູຊາ ຂອງພໍ່ແມ່ປະຊາຊົນ ຢູ່ ວັດພະທາດ ສີໂຄດຕະບອງ ຖືກເສຍຫາຍ ແມ່ນ​ຫລັງຄາກະເບື້ອງ (ສິມໃຫ່ຍ), ສາລາໂຮງທຳ (ຫໍແຈກ) ໄດ້ຖືກເສຍຫາຍຂຸລົງ ແລະ ເສຍຫາຍໜັກກ່ວາໝູ່ແມ່ນ ກົມມະລຽນ ຢູ່ທາງພາກເບື້ອງໃຕ້ຂອງວັດ ເປັນແຖວທີ່ມີ ຄວາມຍາວ 40 ແມັດ. ​ແຕ່​ຍັງ​ບໍ່​ສາມາດ​ ປະ​ເມີນ​ເປັນ​ມູນ​ຄ່າ ​ເສຍ​ຫາຍ​​ໄດ້​ເທື່ອ.

ແຫລ່ງຂ່າວ:

 
ຕິດຕາມເລື່ອງດີດີ ວິທະຍາສຶກສາ ກົດໄລຄ໌ເລີຍ!