ຂປລ.ໂດຍຕອບສະໜອງຕາມຄຳເຊີນຂອງ ສະຫາຍ ຫງວຽນຟູຈ້ອງ, ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ແລະ ສະຫາຍ ເຈິນດ້າຍກວາງ, ປະທານປະເທດແຫ່ງ ສສ ຫວຽດນາມ, ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະຜູ້ແທນຂັ້ນສູງຂອງພັກ-ລັດ ລາວ ໄດ້ຢ້ຽມຢາມສັນຖະວະໄມຕີ ສສ ຫວຽດນາມ ຢ່າງເປັນທາງການ ແຕ່ວັນທີ 25-27 ເມສາ 2016.
ສະຫາຍ ບຸນຍັງ ວໍລະຈິດ, ເລຂາທິການໃຫຍ່ ຄະນະບໍລິຫານງານສູນກາງ ພັກປະຊາຊົນປະຕິວັດລາວ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະ ໄດ້ຮັບການຕ້ອນຮັບຢ່າງອົບອຸ່ນ ແລະ ສົມກຽດ ຈາກ ສະຫາຍ ຫງວຽນຟູ່ຈ້ອງ, ເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ແລະ ສະຫາຍ ເຈີນດ້າຍກວາງ, ກຳມະການກົມການເມືອງສູນກາງພັກ, ປະທານປະເທດ ແຫ່ງ ສສ ຫວຽດນາມ, ພ້ອມດ້ວຍການນຳພັກ, ລັດຖະບານ ແລະ ປະຊາຊົນ ຫວຽດນາມອ້າຍນ້ອງ ທັງຢູ່ນະຄອນຫລວງ ຮ່າໂນ້ຍ ແລະ ນະຄອນ ໂຮ່ຈິມິນ.
ໃນໄລຍະການຢ້ຽມຢາມ, ສະຫາຍ ບຸນຍັງ ວໍລະຈິດ ໄດ້ພົບປເຈລະຈາກັບ ສະຫາຍ ຫງວຽນຟູຈ້ອງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດ ຫວຽດນາມ, ໄດ້ພົບປະຢ້ຽມຢາມສະຫາຍ ເຈີນດ້າຍກວາງ ກຳມະການ ກົມການເມືອງສູນກາງພັກ, ປະທານປະເທດ ແຫ່ງ ສສ ຫວຽດນາມ, ໄດ້ຢ້ຽມຢາມພົບປະກັບ ສະຫາຍ ຫງວຽນຊວນຟຸກ ນາຍົກລັດຖະມົນຕີ ແຫ່ງ ສສ ຫວຽດນາມ; ຢ້ຽມຢາມພົບປະ ສະຫາຍ ຫງວຽນທິກິມເງິນ ປະທານສະພາແຫ່ງຊາດ ຫວຽດນາມ; ຮັບການເຂົ້າຢ້ຽມຂ່ຳນັບຂອງຄະນະສະມາຄົມມິດຕະພາບ ລາວ-ຫວຽດນາມ ແລະ ຄະນະອາດີດທະຫານອາສາສະມັກ ແລະ ຊ່ຽວຊານທະຫານຫວຽດນາມ. ໃນການພົບປະດັ່ງກ່າວ, ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບ ຖານສະ ຫາຍອ້າຍນ້ອງອັນສະໜິດສະໜົມ, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການທີ່ພົ້ນເດັ່ນຂອງແຕ່ລະພັກ, ແຕ່ລະປະເທດ, ໂດຍສະເພາະແມ່ນບັນດາ ຜົນສຳ ເລັດ ຂອງແຕ່ລະປະເທດໃນການສ້າງສາພັດທະນາປະເທດ ໃນໄລຍະທີ່ຜ່ານມາ ເປັນຕົ້ນ ແມ່ນຜົນສຳເລັດ ໃນການປ່ຽນແປງໃໝ່ໄລຍະ 30 ປີ ຢູ່ແຕ່ລະປະເທດ, ຜົນສຳເລັດໃນການປະຕິບັດມະຕິກອງປະຊຸມໃຫຍ່ຄັ້ງທີ IX ຂອງ ພັກ ປປ ລາວ ແລະ ຄັ້ງທີ XII ຂອງພັກກອມມູນິດຫວຽດນາມ, ໄດ້ຕີລາຄາສູງ ແລະ ຊົມເຊີຍຜົນສຳເລັດຂອງ ກອງປະຊຸມຄັ້ງທີ X ຂອງພັກ ປປ ລາວ ແລະ ຄັ້ງທີ XII ຂອງພັກກອມມຸນິດຫວຽດນາມ ອັນໄດ້ເຮັດໃຫ້ທັງສອງປະເທດ ໄດ້ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ເປັນລະບຽບຮຽບຮ້ອຍ, ວຽກງານປ້ອງກັນ ຊາດປ້ອງກັນຄວາມສະຫງົບ ໄດ້ມີຄວາມ ໝັກແໜ້ນ, ຊີວິດການເປັນຢູ່ຂອງປະຊາຊົນ ຂອງແຕ່ລະປະເທດໄດ້ຮັບການປົວແປງດີຂື້ນເທື່ອລະກ້າວ, ວຽກງານການຕ່າງປະເທດໄດ້ຮັບການເປີດກວາງ, ອິດທິພົນຂອງສອງປະເທດໃນເວທີພາກພື້ນ ແລະ ສາກົນນັບມື້ສູງເດັ່ນ.
ການນຳຂັ້ນສູງຂອງສອງພັກ, ສອງລັດ ໄດ້ຕີລາຄາສູງ ແລະ ມີຄວາມພາກພູມໃຈທີ່ເຫັນວ່າ ເຖິງສະພາບການໃນພາກພື້ນ ແລະ ສາກົນມີການຜົນແປຢ່າງຊັບຊ້ອນ, ແຕ່ການຮ່ວມມືສາຍພົວພັນພິເສດ ລາວ-ຫວຽດນາມ ຍັງສືບຕໍ່ໄດ້ຮັບການສີມຂະຫຍາຍທັງລວງກວ້າງ ແລະ ລວງເລິກ, ການພົວພັນ ດ້ານການເມືອງສືບຕໍ່ໄດ້ມີຄວາມເລິກເຊິ່ງ, ມີການ ແລກປ່ຽນຢ້ຽມຢາມຂັ້ນສູງນຳກັນເປັນປົກກະຕິ, ການພົວພັນເສດຖະກິດ, ການຄ້າ, ລົງທຶນ, ສຶກສາ, ບຳລຸງສ້າງ, ວັດທະນາທຳ ແລະ ວິທະຍາສາດເຕັກໂນໂລຊີ ໄດ້ຮັບການເປີດກວ້າງ, ພວມນຳມາປະສິດທິຜົນມາສູ່ສອງປະເທດ, ຫວຽດນາມ ຍັງເປັນປະເທດ ຍືນຢູ່ແຖວໜ້າໃນການລົງທຶນຢູ່ລາວ.
ການນຳຂັ້ນສູງຂອງສອງພັກ, ສອງລັດ ລາວ-ຫວຽດນາມ ໄດ້ຢືນຢັນຄືນກ່ຽວກັບ ການຈະຮ່ວມມືສືບຕໍ່ ເສີມຂະຫຍາຍສາຍພົວພັນພິເສດ ທີ່ປະທານໂຮ່ຈິມິງຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພາ ນຸວົງ ທີ່ເຂົ້າລົບຮັກໄດ້ສ້າງ ແລະ ຖະນຸຖະໜອມມານັ້ນ ໃຫ້ນັບມື້ແຕກດອກອອກຜົນ ແລະມີປະສິດທິຜົນຍິ່ງໆຂື້ນ, ສືບຕໍ່ສຶກສາອົບຮົມປະຊາຊົນສອງຊາດ, ພິເສດ ແມ່ນຄົນຮຸ່ນໜຸ່ມ ໃຫ້ຮູ້ກ່ຽວກັບູນເຊື້ອຄວາມສາມັກຄີ ລາວ-ຫວຽດນາມ ຖືເປັນຄວາມຮັບຜິດຊອບຂອງກັນ ໃນການປົກປັກຮັກສາ ຕໍ່ຜົນປະໂຫຍດຂອງຊາດ ກໍຄື ເພື່ອສັນຕິພາບມິດຕະພາບ ແລະ ການຮ່ວມມືໃນພາກພື້ນ ແລະ ໃນໂລກ.
ແຫລ່ງຂ່າວ:
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!