ທີ 22 ເມສາ ຊຶ່ງເປັນວັນຄຸ້ມຄອງໂລກ, ສປປ ລາວ ໄດ້ລົງນາມຂໍ້ຕົກລົງວ່າດ້ວຍການປ່ຽນແປງດ້ານສະພາບອາກາດທີ່ມີຄວາມໝາຍສຳຄັນທາງປະຫວັດສາດທີ່ນິວຢອກ.
ໃນກາລະໂອກາດປະຫວັດສາດຄັ້ງນີ້, ຕາງໜ້າ ສປປ ລາວ ທີ່ເຂົ້າຮ່ວມປະກອບມີ ທ່ານ ສົມມາດ ພົນເສນາ, ລັດຖະມົນຕີກະຊວງຊັບພະຍາກອນທຳມະຊາດ ແລະສິ່ງແວດລ້ອມ, ທ່ານ ພູວົງ ຫຼວງໄຊຊະນະ, ຫົວໜ້າກົມຄຸ້ມຄອງຄວາມສ່ຽງ ແລະການປ່ຽນແປງດ້ານສະພາບອາກາດ ແລະທ່ານ ດາວວີ ວົງໄຊ, ຫົວໜ້າພະແນກເສດຖະກິດ-ສັງຄົມສະຫະປະຊາຊາດ, ກົມອົງການຈັດຕັ້ງສາກົນ, ກະຊວງການຕ່າງປະເທດ .
ເປັນຄັ້ງທຳອິດທີ່ເກືອບ 200 ປະເທດຮ່ວມມືກັນສ້າງແຜນງານດ້ານສະພາບອາກາດໄລຍະຍາວທີ່ມີຄວາມຄາດໝາຍສູງຊຶ່ງເປັນການສົ່ງສັນຍານແຈ້ງບອກວ່າທຸກປະເທດຕ້ອງເອົາໃຈໃສ່ລົງມືປະຕິບັດກ່ຽວກັບວຽກງານດ້ານສະພາບອາກາດ. ຂໍ້ຕົກລົງນີ້ມີຄວາມຍຸຕິທຳ ແລະນຳໃຊ້ກັບທຸກປະ ເທດ.
ນອກຈາກນີ້, ຍັງເປັນການສົ່ງສັນຍານແຈ້ງເຖິງບັນດາທຸລະກິດ ແລະພາກ ເອກະຊົນວ່າໂລກກຳລັງກ້າວໄປສູ່ເສດຖະກິດພະລັງງານສະອາດ. ຂໍ້ຕົກລົງນີ້ເພື່ອສົ່ງເສີມການລົງມືປະຕິບັດແຜນງານຕາມໄລຍະລວມທັງເນັ້ນໜັກໃສ່ການລະດົມການເງິນດ້ານສະພາບອາກາດຈາກສາທາລະນະຊົນ ແລະພາກເອກະຊົນເພື່ອຊ່ວຍແບ່ງໜັກໃຫ້ເປັນເບົາໃນໄລຍະການປັບຕົວໃນບັນດາປະເທດທຸກຍາກ ແລະດ້ອຍໂອກາດທີ່ສຸດ.
ຂໍ້ຕົກລົງສະບັບນີ້ ທັງເປັນການສ້າງຄວາມເຊື່ອໝັ້ນ ແລະ ຊຸກຍູ້ການລົງມືປະຕິບັດແຜນງານທີ່ມີຄວາມຄາດໝາຍສູງລວມເຖິງການສ້າງເງື່ອນໄຂພັນທະດ້ານຄວາມໂປ່ງໃສ ສຳລັບທັງປະເທດພັດທະນາແລະກຳລັງພັດທະນາເພື່ອຮັບປະກັນວ່າແຕ່ລະປະເທດປະຕິບັດໃຫ້ໄດ້ຕາມພັນທະຂອງຕົນ. ຂໍ້ຕົກລົງປາຣີຈະຊ່ວຍກະຕຸກຊຸກຍູ້ຄວາມກ້າວໜ້າຕົວຈິງກ່ຽວກັບການລົງທຶນເພື່ອຫຼຸດຜ່ອນປະລິມານກາກບອນ.
ທີ່ມາ: 