ສຳນັກຂ່າວຕ່າງປະເທດ ລາຍງານໃນວັນທີ 25 ເມສານີ້ວ່າ ທ່ານ ບາຣັກ ໂອບາມາ ປະທານາທິບໍດີ ແຫ່ງ ສະຫະລັດອາເມຣິກາ ໄດ້ປະກາດແຜນສົ່ງທະຫານກອງຕີພິເສດໄປຊີຣີ ເພີ່ມອີກ 250 ຄົນ ຊຶ່ງຈະເຮັດໃຫ້ມີທະຫານອາເມຣິກາ ເຂົ້າໄປປະຈຳການຢູ່ປະເທດຊີຣີເພີ່ມຂຶ້ນເປັນ 300 ຄົນ ເພື່ອຍົກລະດັບການໂຈມຕີ ກຸ່ມລັດອິດສະລາມ ຫລື ກຸ່ມໄອເອັສ.
ທັງນີ້ ສົງຄາມກາງເມືອງຢູ່ຊີຣີ ໄດ້ຂ້າປະຊາຊົນຊາວຊີຣີໄປແລ້ວ ຫລາຍກວ່າ 250,000 ຄົນ ຕະຫລອດໄລະ 5 ປີຜ່ານມາ ໂດຍທ່ານໂອບາມາເອງ ໄດ້ເນັ້ນຢ້ຳມາຕະຫລອດວ່າ ຕົນເອງບໍ່ຄິດທີ່ຈະສົ່ງທະຫານພາກພື້ນດິນ ເຂົ້າໄປແຊກແຊງຢູ່ຊີຣີຢ່າງເດັດຂາດ, ແຕ່ແນວໃດກໍຕາມ ກອງທັບສະຫະລັດອາເມຣິກາ ໄດ້ຈັດສົ່ງທະຫານກອງຕີພິເສດ ເຂົ້າໄປປະຈຳການຢູ່ຊີຣີ ຈຳນວນ 50 ຄົນ ເມື່ອປີກາຍນີ້ແລ້ວ ຊຶ່ງເຈົ້າໜ້າທີ່ອາເມຣິກາໄດ້ລະບຸວ່າ ເປັນພາລະກິດເພື່ອຕໍ່ຕ້ານການກໍ່ການຮ້າຍ ຫາກບໍ່ແມ່ນການໄປໜູນຫລັງ ຊ່ວຍຝ່າຍໃດຝ່າຍໜຶ່ງ ໃນສົງຄາມຊີຣີ.
ຕິດຕາມເລື່ອງດີດີເພຈທ່ຽວເມືອງລາວ Laotrips ກົດໄລຄ໌ເລີຍ!