ສຳນັກຂ່າວຕ່າງປະເທດ ລາຍງານໃນວັນທີ 22 ເມສານີ້ວ່າ ທາງການຫວຽດນາມ ກຳລັງເລັ່ງສືບສວນຫາສາເຫດ ກ່ຽວກັບປະກົດການປາຈຳນວນມະຫາສານ ຢູ່ເຂດຕາມແນວຊາຍຝັ່ງທາງພາກກາງຂອງປະເທດ ຕາຍ ແລະ ຖືກຄື້ນນ້ຳຊັດຂຶ້ນມາຄ້າງຕາມຊາຍຫາດ ໃນບໍ່ພໍເທົ່າໃດວັນຜ່ານມານີ້ ໂດຍປາຈຳນວນຫລາຍໂຕນ ເປັນສາຍພັນທີ່ຫາຍາກ, ອາໄສຢູ່ໄກຈາກຊາຍຝັ່ງ ແລະ ຢູ່ໃນນ້ຳເລິກ ຊຶ່ງພົບເຫັນຕາຍຄ້າງຊາຍຫາດ ແຂວງຮ່າຕິງ, ກວາງຈິ, ກວາງບິງ ແລະ ເທິທຽນເຫວ້.

ຊາວປະມົງຫວຽດນາມໃນທ້ອງຖິ່ນໃຫ້ຮູ້ວ່າ ພວກເຂົາບໍ່ເຄີຍເຫັນປະກົດການແນວນີ້ຈັກເທື່ອ ໂດຍພຽງແຕ່ຂີ່ເຮືອ ອອກຈາກຊາຍຝັ່ງ ພຽງ 3-4 ກິໂລແມັດເທົ່ານັ້ນ ກໍຈະເຫັນປາຕາຍເຕັມທ້ອງທະເລໄປໝົດ.  ດ້ານເຈົ້າໜ້າທີ່ການປະມົງຫວຽດນາມ ປະຈຳແຂວງກວາງບິງ ກໍໄດ້ໃຫ້ທັດສະນະວ່າ ປາຕາຍຈຳນວນດັ່ງກ່າວ ອາດແມ່ນຍ້ອນສານພິດບາງຢ່າງ.