ສຳນັກຂ່າວຕ່າງປະເທດ ລາຍງານໃນວັນທີ 17 ເມສາຜ່ານມານີ້ວ່າ ທ່ານ ຖິ່ນຈໍ ປະທານາທິບໍດີມຽນມາ ໄດ້ອອກຖະແຫລງການ ໃນວັນຂຶ້ນປີໃໝ່ຂອງຊາວມຽນມາ ເມື່ອວັນທີ 17 ເມສາ 2016 ນີ້ວ່າ ໄດ້ມີການໃຫ້ອະໄພຍະໂທດ ແກ່ນັກໂທດຈຳນວນ 83 ຄົນ ເນື່ອງໃນໂອກາດປີໃໝ່ມຽນມາ ຊຶ່ງເປັນຄວາມຕັ້ງໃຈ ທີ່ຈະເຮັດໃຫ້ປະຊາຊົນຮູ້ສຶກມີຄວາມສຸກ ແລະ ສົ່ງເສີມຄວາມສາມັກຄີປອງດອງ ໃນໄລຍະປີໃໝ່.
ທັງນີ້ ຄຳກ່າວສູນທອນພົດ ເນື່ອງໃນໂອກາດປີໃໝ່ມຽນມາ ທີ່ມີການຖ່າຍທອດສົດທາງໂທລະພາບ ທ່ານປະທານາທິບໍດີມຽນມາ ກໍໄດ້ເນັ້ນຢ້ຳຄວາມຕັ້ງໃຈຂອງລັດຖະບານໃໝ່ ໃນການປ່ອຍຕົວນັກໂທດການເມືອງ ທີ່ຖືກຈຳຄຸກຢູ່ໃນປັດຈຸບັນ ຕາມນະໂຍບາຍຂອງພັກ NLD ຂອງທ່ານນາງ ອອງຊານ ຊູຈີ.