ສຳນັກຂ່າວຕ່າງປະເທດ ລາຍງານໃນວັນທີ 5 ເມສາຜ່ານມານີ້ວ່າ ກະຊວງສາທາລະນະສຸກຫວຽດນາມ ກວດພົບຍິງຊາວຫວຽດນາມ 2 ຄົນ ຕິດເຊື້ອໄວຣັສຊິກາ ໂດຍຜູ້ໜຶ່ງມີອາຍຸ 64 ປີ ປະຊາຊົນເມືອງຍາຈາງ ແລະ ອີກຜູ້ໜຶ່ງອາຍຸ 33 ປີ ຢູ່ນະຄອນໂຮ່ຈິມິນ ຊຶ່ງມີອາການໄຂ້ຂຶ້ນເມື່ອທ້າຍເດືອນມີນາຜ່ານມາ ແລະ ຈາກການກວດວິເຄາະແລ້ວເຖິງ 3 ຄັ້ງ ແພດຢືນຢັນວ່າ ທັງສອງຄົນມີເຊື້ອໄວຣັສຊິກ້າ.  ແນວໃດກໍຕາມ, ກະຊວງສາທາລະນະສຸກຫວຽດນາມ ໄດ້ລະບຸວ່າ ຄົນເຈັບທອງ 2 ຄົນ ມີອາການຄົງທີ່ແລ້ວ ແລະ ບໍ່ພົບການຕິດເຊື້ອເພີ່ມເຕີມ ໃນບັນດາຍາດພີ່ນ້ອງ ແລະ ຄົນໃກ້ຊິດຂອງພວກກ່ຽວແຕ່ຢ່າງໃດ.

ທັງນີ້ ໄວຣັສຊິກາ ຊຶ່ງເປັນພະຍາດທີ່ມີຍຸງເປັນພາຫະນະນຳເຊື້ອ ເຖິງແມ່ນປັດຈຸບັນ ຍັງບໍ່ທັນພິສູດໄດ້ວ່າ ເຊື້ອໄວຣັສຊະນິດນີ້ ເປັນສາເຫດເຮັດໃຫ້ເກີດຄວາມພິການທາງສະໝອງ ໃນເດັກນ້ອຍເກີດໃໝ່, ແຕ່ໄລຍະຜ່ານມາ ແມ່ນພົບຫລັກຖານທີ່ເຊື່ອມໂຍງກັນຫລາຍຍິ່ງຂຶ້ນ ໂດຍສະເພາະໃນປະເທດບຣາຊິນ ໄດ້ມີການຢືນຢັນວ່າ ເດັກນ້ອຍເກີດໃໝ່ ທີ່ມີຮ່າງກາຍຫົວນ້ອຍຜິດປົກກະຕິ ຫລາຍກວ່າ 860 ຄົນ ແມ່ນສ່ວນໃຫຍ່ມີແມ່ ຕິດເຊື້ອໄວຣັສຊິກາ.