ສຳນັກຂ່າວຕ່າງປະເທດ ລາຍງານໃນວັນທີ 31 ມີນານີ້ວ່າ ກອງທັບສະຫະລັດອາເມຮິກາ ຈະເສີມກຳລັງທະຫານ ເຂົ້າໄປປະຈຳການ ຢູ່ພາກພື້ນເອີຣົບຕາເວັນອອກຫລາຍຂຶ້ນກວ່າເກົ່າ ໂດຍຕັ້ງເປົ້າຮອດເດືອນກຸມພາປີ 2017 ຈະສົ່ງກອງພົນນ້ອຍ ຈຳນວນ 3 ກອງພົນ ຊຶ່ງແຕ່ລະກອງພົນ ຈະປະກອບມີທະຫານປະມານ 4,500 ຄົນ ພ້ອມດ້ວຍລົດຫຸ້ມເກາະ ແລະ ອາວຸດຍຸດໂທປະກອນອື່ນໆ ຜັດປ່ຽນກັນເຂົ້າໄປປະຈຳການ ໃນພື້ນທີ່ຕ່າງໆຂອງເອີຣົບຕາເວັນອອກ.

ທ່ານ ຟິລິບ ບຣີດເລີບ ຜູ້ບັນຊາການລະດັບສູງຂອງກອງທັບສະຫະລັດອາເມຣິກາ ໃນທະວີບເອີຣົບ ໄດ້ກ່າວວ່າ ” ແຜນການນີ້ ສະແດງໃຫ້ເຫັນເຖິງຄວາມເຂັ້ມແຂງ ແລະ ແນວທາງອັນໝັ້ນທ່ຽງຂອງພວກເຮົາ ເພື່ອຜ່ອນຄາຍຄວາມກັງວົນ ໃຫ້ແກ່ບັນດາຊາດພັນທະມິດນາໂຕ້ ແລະ ຮຸ້ນສ່ວນຂອງເຮົາ ອັນເປັນຜົນສືບເນື່ອງຈາກ ທ່າທີ່ອັນແຂງແຮງຂອງຣັດເຊຍ ໃນເອີຣົບຕາເວັນອອກ ແລະ ສະຖານທີ່ອື່ນໆ ”