ທ້າຍອາທິດຜ່ານມາ ນີ້ພະແນກອຸດສາຫະກຳ ແລະການຄ້າແຂວງຄຳມ່ວນ ໄດ້ຮ່ວມກັບສະຖາບັນຄົ້ນຄວ້າເສດຖະກິດການຄ້າຈັດກອງປະຊຸມການຄ້າ ແລະການພັດທະນາແບບຍືນຍົງຂຶ້ນທີ່ໂຮງແຮມຣີເວີເຣຍ ເມືອງທ່າແຂກ ໂດຍການເປັນກຽດເຂົ້າຮ່ວມຂອງ ທ່ານ ສິງເພັດ ແກ້ວໂສພາ ຫົວໜ້າພະແນກອຸດສາຫະກຳ ແລະການຄ້າແຂວງ, ທ່ານ ສັນຕິສຸກ ວິໄລຈະເລີນ ຫົວໜ້າສະຖາບັນຄົ້ນຄວ້າເສດຖະກິດການຄ້າ, ມີບັນດານັກວິຊາການການຄ້າທັງສູນກາງ ແລະທ້ອງຖິ່ນຕະຫຼອດຮອດບັນດາຫົວໜ່ວຍທຸລະກິດ, ຜູ້ປະກອບການທີ່ກ່ຽວຂ້ອງເຂົ້າຮ່ວມ.
ກອງປະຊຸມວິຊາການຄົ້ນຄ້ວານີ້ ແມ່ນໄດ້ຈັດຂຶ້ນເປັນຄັ້ງທີ V ຊຶ່ງບັນດາຜູ້ເຂົ້າຮ່ວມແມ່ນໄດ້ຮຽນຮູ້ ແລະຮັບຟັງການບັນຍາຍຈາກນັກວິທະຍາກອນທີ່ມາຈາກສູນກາງກຽ່ວກັບບັນດາຫຼັກການທີ່ພົວພັນເຖິງວຽກງານຂະແໜງເສດຖະກິດ, ການຄ້າ-ການລົງທຶນ ໂດຍສະ ເພາະກໍແມ່ນການສ້າງຄວາມເຂັ້ມແຂງ ແລະຄວາມສາມາດໃນການແຂ່ງຂັນໃຫ້ ກັບທຸລະກິດຂະໜາດນ້ອຍ-ກາງໃນລາວ, ການສ້າງໂອກາດໃຫ້ກັບທຸລະກິດຂະໜາດນ້ອຍ-ກາງ ເພື່ອເຊື່ອມໂຍງເຂົ້າຕ່ອງໂສ້ມູນຄ່າເພີ່ມ ຫຼື ການຜະລິດສາກົນ, ການສົ່ງເສີມການລົງທຶນພັດທະນາແບບຍືນຍົງ, ການຄ້າສິນຄ້າກະສິກຳ-ຕະຫຼາດຕ່າງປະເທດ ແລະຍຸດທະວິທີການສ້າງສາຍພົວພັນລະຫວ່າງທຸລະກິດໃນເສດຖະກິດພິເສດ ແລະທຸລະກິດຂະໜາດນ້ອຍ-ກາງ.
ຈຸດປະສົງຂອງກອງປະຊຸມກໍເພື່ອແນໃສ່ໃຫ້ບັນດາຜູ້ເຂົ້າຮ່ວມມີຄວາມຮັບຮູ້ດ້ານວຽກງານການຄ້າໃຫ້ຫຼາຍຂຶ້ນກວ່າເກົ່າ ທັງເປັນການເປີດໂອກາດໃຫ້ແກ່ບັນດາທ່ານທີ່ເຂົ້າຮ່ວມທັງສູນກາງ ແລະທ້ອງຖິ່ນໄດ້ມີໂອກາດແລກປ່ຽນບົດຮຽນເຊິ່ງກັນ ແລະກັນ.
ໃນໂອກາດດຽວກັນກອງປະຊຸມຍັງ ໄດ້ເຜີຍແຜ່ບົດຄົ້ນຄວ້າດ້ານການຄ້າ, ການຄົ້ນຄວ້າດ້ານໂອກາດ ແລະສິ່ງທ້າທາຍຂອງທຸລະກິດຂະໜາດນ້ອຍ-ກາງ ເພື່ອໃຫ້ບັນດາທ່ານທີ່ເຂົ້າຮ່ວມໄດ້ລະດົມແນວຄວາມຄິດປະກອບຄຳເຫັນໃສ່ບົດດັ່ງກ່າວໃຫ້ມີຄວາມແທດເໝາະກັບສະພາບຕົວຈິງ ເພື່ອນຳໃຊ້ເຂົ້າໃນການພັດທະນານະໂຍບາຍການຄ້າໃນອະນາຄົດ.