ສຳນັກຂ່າວຕ່າງປະເທດ ລາຍງານໃນວັນທີ 24 ມີນາຜ່ານມານີ້ວ່າ ບໍລິສັດ ຊິກແຟລັກສ໌ ເອັນເຕີເທນເມັ້ນ ຊຶ່ງເປັນບໍລິສັດໃຫ້ບໍລິການສວນສະໜຸກ ຍັກໃຫຍ່ລະດັບໂລກ ປະກາດຮ່ວມມືກັບບໍລິສັດ ເນວີ ເອັນເຕີເທນເມັ້ນ ຂອງຫວຽດນາມ ສ້າງສວນສະໜຸກ ແລະ ສວນນ້ຳຂະໜາດໃຫຍ່ ໃກ້ກັບນະຄອນໂຮ່ຈິມິນ ທາງພາກໃຕ້ຂອງຫວຽດນາມ ໃນຊື່ສວນສະໜຸກ ” ຊິກແຟລັກສ໌ ” ຫລື Sixflags ແລະ ” ຊິກແຟລັກສ໌ ເຮີຣິເຄນ ຮາເບີ ” ຫລື Sixflags Harry Kane Harbor ໂດຍວາງຄາດໝາຍ ເປີດໃຫ້ບໍລິການຕ້ອນຮັບນັກທ່ອງທ່ຽວ ໃນອີກ 3-4 ປີຂ້າງໜ້າ.
ທັງນີ້ ບໍລິສັດ ຊິກແຟລັກສ໌ ເອັນເຕີເທນເມັ້ນ ເປັນເຈົ້າຂອງ ແລະ ບໍລິຫານສວນສະໜຸກ 18 ແຫ່ງ ໃນສະຫະລັດອາເມຣິກາ, ແມັກຊິກ ແລະ ການາດາ ຊຶ່ງການລົງທຶນ ກໍ່ສ້າງສວນສະໜຸກຢູ່ຫວຽດນາມ ແມ່ນເປັນປາຍທາງແຫ່ງທີ 3 ນອກອານາເຂດທະວີບອາເມຣິກາ ໂດຍກ່ອນໜ້ານີ້ ບໍລິສັດດັ່ງກ່າວ ໄດ້ລົງທຶນສ້າງສວນສະໜຸກ ຢູ່ນະຄອນຊຽງໄຮ້ ປະເທດຈີນ ທີ່ຈະເປີດໃຫ້ບໍລິການໃນປີ 2019 ແລະ ອີກແຫ່ງໜຶ່ງ ຢູ່ນະຄອນດູໄບ ປະເທດສະຫະລັດອາຣັບເອມິເຣດ ທີ່ມີຄາດໝາຍເປີດໃຫ້ບໍລິການ ພາຍໃນປີ 2017 ນີ້.