ໃນວັນທີ 24 ມີນາຜ່ານມາ ທີ່ລັດວິສາຫະກິດນໍ້າປະປານະຄອນຫຼວງວຽງຈັນ ໄດ້ຈັດພິທີເຊັນສັນຍາໂຄງການຍົກຍ້າຍທໍ່ນໍ້າປະປາອອກຈາກແລວທາງໂຄງການກໍ່ສ້າງທາງແຕ່ຈີ່ນາຍໂມ້-ບ້ານຫ້ອມ-ບ້ານຊາຍຟອງ ເມືອງຫາດຊາຍຟອງ ນະຄອນຫຼວງວຽງຈັນ, ລະຫວ່າງລັດວິສາຫະກິດນໍ້າປະປານະຄອນຫຼວງ ກັບ ບໍລິສັດຫາຍຫານການທຸລະກິດຈຳກັດ.
ລົງນາມໃນເຊັນສັນຍາເທື່ອນີ້ ໂດຍແມ່ນທ່ານ YAN MAICHAO ຕາງໜ້າໃຫ້ບໍລິສັດຫາຍຫານການທຸລະກິດ ຈຳກັດ (ເຈົ້າຂອງໂຄງການ) ກັບທ່ານ ຄຳເຜີຍ ວົງສາຄຳຜຸຍ ຜູ້ອຳນວຍການໃຫຍ່ລັດວິສາຫະກິດນໍ້າປະປານະຄອນຫຼວງວຽງຈັນ (ຜູ້ຮັບເໝົາ) ຊຶ່ງມີທ່ານ ເດດສົງຄາມ ທຳມະວົງ ຫົວໜ້າພະແນກໂຍທາທິການ ແລະຂົນສົ່ງ ນະຄອນຫຼວງວຽງຈັນ, ພ້ອມນັ້ນຍັງມີພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ທ່ານ ສີພັນ ອິນເມືອງ ຫົວໜ້າພະແນກຈັດຕັ້ງບໍລິຫານລັດວິສາຫະກິດນໍ້າປະປາ ນະຄອນຫຼວງ ກ່າວວ່າ: ໂຄງການຍົກຍ້າຍທໍ່ນໍ້າ ປະປາມີຄວາມຍາວທັງໝົດ 14 ກິໂລແມັດ ລວມມູນຄ່າ 5,90 ຕື້ກີບ, ໂດຍໃນສັນຍາໄດ້ລະບຸໄວ້ວ່າການ ຊຳລະແມ່ນໄດ້ແບ່ງອອກເປັນ 2 ງວດຄື: ພາຍຫຼັງທີ່ໄດ້ເຊັນສັນຍາສະບັບນີ້ແລ້ວໃຫ້ເຈົ້າຂອງໂຄງການຊຳລະລ່ວງໜ້າ 20% ແລະຫຼັງຈາກວຽກສຳເລັດ 100% ມີການກວດກາແລ້ວຜູ້ສຳປະທານຈະຊຳລະຕື່ມອີກ 80%, ພາຍຫຼັງທີ່ລັດຖະບານຊຳລະເງິນໃຫ້ບໍລິສັດຫາຍຫານການທຸລະກິດ ຈຳກັດ ງວດທີ I ຂອງສົກປີງົບປະມານ 2017-2018 ຕ້ອງຊຳລະໃຫ້ລັດວິສາຫະກິດນໍ້າປະປາໃຫ້ໝົດພາຍໃນ 30 ວັນ.
ເນື່ອງຈາກວ່າໂຄງການດັ່ງກ່າວເປັນໂຄງການທີ່ຈະຕ້ອງໄດ້ລົງມືປະຕິບັດອັນຮີບດ່ວນ, ດັ່ງນັ້ນ ລັດວິສາຫະກິດ ນໍ້າປະປາ ນວ ຕ້ອງປະຕິບັດວຽກດັ່ງກ່າວໃຫ້ສຳເລັດພາຍໃນ 150 ວັນ, ນັບແຕ່ມື້ລົງລາຍເຊັນເປັນຕົ້ນໄປ, ຖ້າຫາກການປະຕິບັດໜ້າວຽກດັ່ງກ່າວບໍ່ສຳເລັດຕາມເວລາທີ່ກຳນົດເພາະສາເຫດຈາກນໍ້າປະປາເອງແມ່ນຈະຖືກປັບໄໝຫັກເງິນຈຳນວນ 2,5% ຂອງມູນຄ່າໂຄງການຍົກຍ້າຍທໍ່ນໍ້າປະປາດັ່ງກ່າວ (ຍົກເວັ້ນຊັກຊ້າຈາກເຈົ້າຂອງໂຄງການ ຫຼື ດ້ານເຕັກນິກຂອງການປັບລະດັບໜ້າທາງ).