ສຳນັກຂ່າວຕ່າງປະເທດ ລາຍງານໃນວັນທີ 24 ມີນານນີ້ວ່າ ອົງການອະນາໄມໂລກ (WHO) ໄດ້ສົ່ງແຈ້ງການເຖິງ ໜ່ວຍງານ IHR ຂອງຫວຽດນາມ ໃນວັນທີ 23 ມີນາຜ່ານມານີ້ໃຫ້ຮູ້ວ່າ ມີຊາວອົດສະຕຣາລີ ຖືກຢັ້ງຢືນວ່າໄດ້ຕິດເຊື້ອໄວຣັສຊິກາ (Zika) ພາຍຫລັງທີ່ເດີນທາງກັບເມືອຈາກຫວຽດນາມ ໂດຍຜູ້ຕິດເຊື້ອລາຍນີ້ ມີອາການເປັນໄຂ້, ອອກຕຸ່ມ, ເຈັບຫົວ, ເຈັບຕາມຕົນໂຕ, ອັກເສບມ່ານຕາ, ຮູ້ສຶກປວດຮາກ ຄ້າຍຄືກັບອາການຂອງການຕິດເຊື້ອ ໄວຣັສຊິກາ ໃນໄລຍະທີ່ຢູ່ຢ້ຽມຢາມຫວຽດນາມ ແຕ່ວັນທີ 26 ກຸມພາ ເຖິງວັນທີ 06 ມີນາຜ່ານມາ ໂດຍຜູ້ກ່ຽວໄດ້ໄປນະຄອນໂຮ່ຈິມິນ, ເລີມດົ່ງ, ແຄ໋ງຮ່ວາ ແລະ ບິ່ງທ້ວນ.
ພາຍຫລັງທີ່ໄດ້ຮັບຂໍ້ມູນດັ່ງກ່າວ ກະຊວງສາທາລະນະສຸກຫວຽດນາມ ໄດ້ແຕ່ງຕັ້ງຄະນະປະຕິບັດງານ ຢູ່ແຂວງແຄ໋ງຮ່ວາ ແລະ ບິ່ງທ້ວນ ເພື່ອເຮັດວຽກກັບຄະນະກຳມະການປະຊາຊົນ ແລະ ບັນດາພະແນກ, ຂະແໜງການທີ່ກ່ຽວຂ້ອງ, ຊີ້ນຳວຽກງານການຕິດຕາມກວດກາໂດຍກົງ, ຢັ້ງຢືນ ແລະ ຜັນຂະຫຍາຍບັນດາການເຄື່ອນໄຫວປ້ອງກັນ, ຕ້ານເຊື້ອໄວຣັສຊິກາຢູ່ຫວຽດນາມ.
ແນວໃດກໍຕາມ ມາຮອດປັດຈຸບັນ ແມ່ນຍັງບໍ່ທັນມີຂໍ້ມູນຄົບຖ້ວນ ແລະ ຢັ້ງຢືນໄດ້ວ່າ ຄົນຜູ້ຕິດເຊື້ອລາຍດັ່ງກ່າວ ອາດຕິດເຊື້ອພະຍາດໄວຣັສຊິກາ ກ່ອນເຂົ້າມາຫວຽດນາມ ຫລື ພາຍຫລັງເດີນທາງອອກຈາກຫວຽດນາມໄປແລ້ວ.