ເມື່ອວັນທີ 14 ມີນາ 2016 ຜ່ານມາຢູ່ທີ່ເຮືອນພັກທູດຝຣັ່ງໄດ້ມີງານຖະ ແຫຼງຂ່າວກ່ຽວກັບເທສະການອາຫານ ຝຣັ່ງໂດຍໃຫ້ກຽດເປັນປະທານຂອງ ທ່ານ ນາງ ໂກຣດິນ ເລີດູ ເອກອັກຄະລັດຖະທູດຝຣັ່ງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ໂກຣດິນ ເລີດູ ໃຫ້ຮູ້ວ່າ: ພາຍຫຼັງປະສົບຜົນສຳເລັດສູງໃນການຈັດເທສະການອາຫານຝຣັ່ງເທື່ອທີ ໜຶ່ງຂອງກະຊວງການຕ່າງປະເທດ ແລະພັດທະນາສາກົນແຫ່ງສາທາລະນະລັດຝຣັ່ງຈິ່ງໄດ້ຕັດສິນໃຈຈັດເທ ສະການດັ່ງກ່າວນີ້ອີກໃນວັນທີ 21 ມີນາ 2016 ທີ່ຈະເຖິງມໍ່ໆນີ້, ໂດຍປີນີ້ແມ່ນມີພໍ່ຄົວຫຼາຍກ່ວາ 1,6 ພັນ ຄົນໃນທົ່ວໂລກໄດ້ໃຫ້ກຽດເຂົ້າຮ່ວມການປຸງແຕ່ງອາຫານຝຣັ່ງທີ່ດີເລີດ ແລະການແບ່ງປັນແລກປ່ຽນຄຸນຄ່າການປຸງແຕ່ງອາຫານ, ຊຶ່ງຈຸດປະສົງໃນການຈັດງານດັ່ງກ່າວນີ້ກໍເພື່ອຊ່ວຍເຜີຍແຜ່ສິລະປະການດຳລົງຊິວິດແບບຝຣັ່ງ.
ສຳລັບປີນີ້ກະຊວງການຕ່າງປະເທດຂອງຝຣັ່ງແມ່ນຕ້ອງການສົ່ງເສີມ “ການບໍລິໂພກທີ່ດີ” ແລະການເຄົາລົບ ສິ່ງແວດລ້ອມ ແລະສົ່ງເສີມໃຫ້ບັນດາຮ້ານອາຫານຕ່າງໆນຳໃຊ້ໄຂມັນ, ນ້ຳຕານ ແລະເກືອໜ້ອຍລົງ ແລະເນັ້ນໃຫ້ຄວາມສຳຄັນປະເພດຜັກ ແລະອາຫານປະເພດເມັດ.
ສຳລັບ ສປປ ລາວ ກໍໄດ້ເຂົ້າຮ່ວມງານດັ່ງກ່າວນີ້ອີກຊຶ່ງຈະໄດ້ຈັດຂື້ນໃນ 5 ສະຖານທີ່ຄືນະຄອນຫຼວງວຽງຈັນ ຮ້ານອາຫານ LAdresse, ໂຮງແຮມ ອັນຊາຣາ, ເຮືອນພັກເອກອັກຄະລັດຖະທູດຝຣັ່ງ, ແຂວງຫຼວງພະບາງທີ່ຮ້ານ ອາຫານ Governors Grill ແລະHotel de la paix (ກຸ່ມທຸລະກິດ ACCORD ຂອງຝຣັ່ງ).
ທີ່ມາ: 