ທ້າຍອາທິດຜ່ານມາທີ່ສະມາຄົມນັກຂ່າວແຫ່ງ ສປປ ລາວ ໄດ້ຈັດພິທີຖະແຫຼງຂ່າວກ່ຽວກັບການຈັດພິທີການ ແລະ ກິດຈະກຳເພື່ອສະເຫຼີມສະຫຼອງວັນຝຣັ່ງໂກໂຟນີສາກົນ 20 ມີນາ ປະຈຳປີ 2016, ໂດຍການຖະແຫຼງຂອງ ທ່ານ ຂວັນຕາ ຜາລີວົງ ຫົວໜ້າກົມເອີຣົບອາເມລິກາ, ກະຊວງການຕ່າງປະເທດ ແລະທັງເປັນຜູປະສານງານແຫ່ງຊາດປະຈຳອົງການຝຣັ່ງໂກໂຟນີສາກົນ, ໃຫ້ກຽດເຂົ້າຮ່ວມໂດຍ ທ່ານ ນາງ Claudine LEDOUX ເອກອັກຄະລັກຖະທູດຝຣັ່ງ ປະຈຳ ລາວ, ທ່ານ ສົມສະໜຸກ ມີໄຊ ຮອງປະທານສະມາຄົມນັກຂ່າວລາວ, ພ້ອມດ້ວຍຜູ້ຕາງໜ້າຈາກສະຖານທູດຝຣັ່ງ ແລະຫົວໜ້າຫ້ອງການມະຫາວິທະຍາໄລຝຣັ່ງໂກໂຟນີ (AUF)ເຂົ້າຮ່ວມ.
ທ່ານ ຂວັນຕາ ຜາລີວົງ ໄດ້ສະເໜີໃຫ້ຊາບໂດຍຫຍໍ້ວ່າ: ອົງການຝຣັ່ງໂກ ໂຟນີສາກົນແມ່ນອົງການຈັດຕັ້ງສາກົນ ສຳລັບບັນດາປະເທດທີ່ໃຊ້ພາສາຝຣັ່ງ ຊຶ່ງໄດ້ຮັບການສ້າງຕັ້ງຂຶ້ນໃນວັນທີ 20 ມີນາ 1970 ໂດຍມີຈຸດປະສົງຕົ້ນຕໍເພື່ອສ້າງຄວາມສາມັກຄີ, ການຮ່ວມມື ແລະ ການປົກປ້ອງຫຼາກຫຼາຍທາງດ້ານວັດທະນະທຳ.
ປະຈຸບັນອົງການດັ່ງກ່າວມີສະມາຊິກທັງໝົດ 80 ປະເທດໃນນັ້ນມີ 57 ປະເທດທີ່ເປັນສະມາຊິກສົມບູນ ແລະ 23 ປະເທດສັງເກດການ ສປປ ລາວ ໄດ້ເຂົ້າເປັນສະມາຊິກສົມບູນຂອງອົງການດັ່ງກ່າວໃນວັນທີ 22 ພະຈິກ 1991, ອົງການດັ່ງກ່າວໄດ້ໃຫ້ການຮ່ວມມື ແລະ ການຊ່ວຍເຫຼືອແກ່ລາວໃນຫຼາຍໆດ້ານໂດຍສະເພາະໃນການຍົກລະດັບຄວາມຮູ້ຄວາມສາມາດຂອງບຸກຂະລາກອນໃນຂະແໜງການສຶກສາ, ສາທາລະນະສຸກ ແລະວັດທະນະທຳ.
ໃນຖານະທີ່ເປັນສະມາຊິກ ສປປ ລາວແມ່ນໄດ້ປະກອບສ່ວນສຳຄັນໃຫ້ແກ່ ວຽກງານຕ່າງໆກໍຄື ການເຂົ້າຮ່ວມກອງ ປະຊຸມສຳຄັນຂອງອົງການດັ່ງກ່າວ, ນອກຈາກນີ້ ສປປ ລາວ ກໍຄືບັນດາປະເທດສະມາຊິກອື່ນໆແມ່ນໄດ້ຈັດພິທີທາງການ ແລະກິດຈະກຳຕ່າງໆເພື່ອສະເຫຼີມ ສະຫຼອງວັນຝຣັ່ງໂກໂຟນີສາກົນ 20 ມີນາ ໃນໄລຍະເດືອນມີນາຂອງທຸກໆປີ.
ສະເພາະປີນີ້ ກະຊວງການຕ່າງປະ ເທດ ໂດຍຮ່ວມກັບພາກສ່ວນຕ່າງໆທີ່ ກ່ຽວຂ້ອງແມ່ນຈະຈັດໃຫ້ມີພິທີທາງການເພື່ອສະເຫຼີມສະຫຼອງວັນຝຣັ່ງໂກໂຟນີສາກົນຂຶ້ນໃນຕອນບ່າຍຂອງວັນທີ 18 ມີນາ 2016 ຢູ່ຫ້ອງປະຊຸມໃຫຍ່ຂອງມະຫາ ວິທະຍາໄລສະຫວັນນະເຂດ (ແຂວງສະຫວັນນະເຂດ) ພາຍໃຕ້ການເປັນປະ ທານຂອງ ທ່ານ ລັດຖະມົນຕີທີ່ຮັບຜິດ ຊອບວຽກງານຝຣັງໂກໂຟນີ, ພ້ອມດ້ວຍການນຳຂອງແຂວງສະຫວັນນະເຂດ, ທ່ານເອກອັກຄະລັດຖະທູດແຫ່ງສາທາລະນະລັດຝຣັ່ງປະຈຳລາວ, ທູຕະນຸທູດຂອງບັນດາປະເທດທີ່ກ່ຽວຂ້ອງ, ຫົວ ໜ້າຫ້ອງການວິທະຍາໄລຝຣັ່ງໂກໂຟນີ, ຜູ້ຕາງໜ້າອົງການຈັດຕັ້ງສາກົນປະຈຳ ລາວຕະຫຼອດເຖິງບັນດາຄູອາຈານ ແລະ ນັກຮຽນນັກສຶກສາພາສາຝຣັ່ງພາຍໃນແຂວງເຂົ້າຮ່ວມ.
ພ້ອມດຽວກັນນັ້ນບັນດາສະຖາບັນ ການສຶກສາທີ່ມີການຮຽນການສອນພາສາຝຣັ່ງຢູ່ໃນນະຄອນຫຼວງ, ແຂວງ ຫຼວງພະບາງ ແລະແຂວງຈຳປາສັກກໍຍັງຈະມີກິດຈະກຳຕ່າງໆ ເພື່ອສະເຫຼີມສະ ຫຼອງວັນສຳຄັນດັ່ງກ່າວໃນຂອບເຂດ ຂອງຕົນໃນໄລຍະເດືອນມີນາ ປີ 2016 ເຊັ່ນ: ການແຂງຂົນນັກຮຽນເກັ່ງ, ການແຂ່ງຂັນກີລາ ແລະການສະແດງສິລະ ປະວັນນະຄະດີ.
ທີ່ມາ: