ມາ​ເລ​ເຊຍ​ແອ​ລາຍສາຍ​ກາ​ນບິນ​ແຫ່ງ​ຊາດ​ມາ​ເລ​ ພົບ​ເຫດການ​ອັນ​ຮ້າຍ​ແຮງ​ທີ່​ສຸດ​ຂອງ​ໂລກ​ເຖິງ​ສອງ​ເຫ​ດ ການ​ຕິດ​ຕໍ່​ກັນ​ໃນ 2 ປີ​ກ່ອນ ນັ້ນ​ຄືການ​ສູນ​ຫາຍຂອງ​ເຮືອບິນ​ໂດຍສານ​ໂບອິ້ງ 777 ຖ້ຽວບິນ MH370 ພ້ອມ​ຜູ້​ໂດຍສານ 239 ຄົນ ​ແລະ ​ເຮືອບິນ​ໂດຍສານ​ໂບອິງ 777 ຖືກ​ຍິ່ງ​ຕົກ​ຢູ່​ນ່ານຟ້າ​ອູ​ເກຣນ.

ສອງ​ເຫດການ​ນີ້​ເຮັດ​ໃຫ້​ຜູ້​ໂດຍສານ​​ປິ່ນ​ໜ້າ​ໜີ​ສາຍ​ການບິນ​ມາ​ເລ​ເຊຍ​​ແອ​ລາຍ ສົ່ງ​ຜົນ​ເຮັດ​ໃຫ້​ບໍລິສັດ​ຂາດທຶນ 1,7 ຕື້​ໂດ​ລາ​ສະຫະລັດ ກຽມ​ລົ້ມ​ລະລາຍ ​ເຮັດ​ໃຫ້​ລັດຖະບານ​ມາ​ເລ​ເຊຍ​ຜູ້​ເປັນ​ເຈົ້າ​ຂອງ​ສາຍ​ການບິນ​ແຫ່ງ​ນີ້ ຕ້ອງ​ປັບ​ໂຄງ​ສ້າງສາ​ຍການບິນ​ຂະໜາດ​ໃຫຍ່​ດ້ວຍ​ການ​ແຕ່ງ​ຕັ້ງທ່າ​ນ ຄຣິຕອບ ມິລ​ເລີ ປະທານ​ຄົນ​ໃໝ່​ຊາວ​ເຢຍລະ​ມັນ​ຜູ້​ມີ​ປະສົບ​ການ​ມາ​ຟື້ນ​ຟູ​ບໍລິສັດ, ​ໂດຍ​ທ່ານ ມິລ​ເລີ ​ໃຊ້​ວີ​ທີ​ການ​ຫຼຸດ​ ຫຼື​ຍົກ​ເລີກ​ເສັ້ນ​ທາງ​ບິນ​ທີ່​ບໍ່​ສ້າງ​ກຳ​ໄລ, ຫຼຸດ​ຈຳນວນ​ເຮືອບິນ ​ແລະ ປົດ​ພະນັກງານ​ເຖິງ 6 ພັນ​ຄົນ ​ແຕ່​ສາຍ​ການບິນ​ມາ​ເລ​ເຊຍ​ແອ​ລາຍ​ກໍ​ກຳລັງ​ປະ​ເຊີນ​ຄູ່​ແຂ່ງ ຈາກ​ບັນດາ​ສາຍ​ການບິນ​ຕົ້ນທຶນຕໍ່າ ລາຄາ​ປະຢັດ​ເຊັ່ນ: ​ແອ​​ເອເຊຍ, ​ໄລ​ອອນ​ແອ, ​ໄທ​ເກີ​ແອ ​ແລະ ​ເຈັດ​ສຕາ ທີ່​ແຕກ​ຕົວ​ມາ​ຈາກ​ແຄວນ​ຕັສ, ມາ​ເລ​ເຊຍ​ແອ​ລາຍ ຈຶ່ງ​ແກ້​ໄຂ​ດ້ວຍ​ການ​ຈັບ​ມື​ກັບ​ສາຍ​ການບິນ​ເອມິ​ເຣດ ລາຍ​​ໃຫຍ່​ຂອງ​ດູ​ໄບ ​ເພາະ​ຈະ​ໄດ້​ເກາະ​ກ່ຽວ​ເສັ້ນທາງ​ການບິນ​ໄປ​ດ້ວຍ​ກັນ ອັນ​ຈະ​ເປັນ​ການ​ປະຢັດ​ຕົ້ນ​ທຶນ​ໄປ​ໄດ້​ຫຼາຍ ​ແລະ ​ເພື່ອ​ດຶງ​ດູ​ດຜູ້​ໂດຍສານ​ໃຫ້​ຫຼາຍ​ຂຶ້ນ, ມາ​ເລ​ເຊຍ​ແອ​ລາຍ​ກຳລັງ​ປັບປຸງ​ເມ​ນູອາຫານ ​ແລະ ນຳ​ສະ​ເໜີ​ບໍລິການ​ໃໝ່ໆ​ເຊັ່ນ: ສັນຍານ​ວາຍ​ຟາຍ​ເທິງ​ເຮືອບິນ ​ແລະ ບ່ອນ​ນັ່ງ​ແບບ​ໃໝ່, ລວມທັງ​ປັບປຸງ​ຝູງ​ບິນ​ເພື່ອ​ຫຼຸດ​ຕົ້ນ​ທຶນ ​ໂດຍ​ຈະ​ຄ່ອຍ​ໆ​ປົດ​ເຮືອບິນ​ໂບອິງ 777 ທີ່​ເກົ່າ​ລວມທັງ​ແອ​ບັສ A320 ທີ່​ກິນ​ນ້ຳມັນ​ຫຼາຍ ​ແລະ ຫັນ​ມາ​ໃຊ້​ເຮືອ​ບິ​ນ​ໂດຍສານ​ໂບອິງ 737 ທີ່​ລຳ​ນ້ອຍ, ຄ່ອງ​ຕົວ ​ແລະ ປະຢັດ​ກວ່າ ພ້ອມ​ທັງ​ສັ່ງ​ຊື້​ເຮືອບິນ A350 ຈຳນວນ 4 ລຳ ຊຶ່ງ​ເປັນ​ຮຸ່ນ​ທັນ​ສະ​ໄໝ​ສຸດຂອງ​ຄ່າ​ຍ​ແອ​ບັສມາ​ເສີມ.