ຂ່າວ: ໂພທິຣາຊ
ກາຍເປັນອຸບັດເຫດບົນທ້ອງຖະໜົນທີ່ຮຸນແຮງອີກກໍລະນີໜຶ່ງສຳລັບຢູ່ແຂວງຈຳປາສັກ ຫຼັງທີ່ລົດພວງບັນທຸກສິນຄ້າໜັກເສຍຫຼັກເຈືອກໄປຕຳລົດວີໂກ້ແລ້ວຊັດໄປຕຳເອົາກຳແພງກັ້ນຂົວຂ້າມແມ່ນ້ຳຂອງລາວຍີ່ປຸ່ນທີ່ເມືອງປາກເຊທະລຸຕົກລົງແຄມຫາດກາງນ້ຳ ສົ່ງຜົນໃຫ້ມີຜູ້ເສຍຊີວິດຄາທີ່ 2 ຄົນ ແລະ ອີກຄົນໄດ້ຮັບບາດເຈັບເລັກນ້ອຍ.
ຕາມການບອກເລົ່າຂອງຜູ້ເຫັນເຫດການລາຍງານຕໍ່ນັກຂ່າວໜັງສືພິມເສດຖະກິດສັງຄົມປະຈຳແຂວງໃຫ້ຮູ້ວ່າ: ເວລາປະມານ 20 ໂມງຂອງວັນທີ 28 ເມສາ 2014 ຜ່ານມາ, ກ່ອນເກີດອຸບັດເຫດໄດ້ມີລົດພວງຂອງບໍລິສັດຈາກປະເທດໄທ (ໝາຍເລກທະບຽນ 763793), ແຕ່ພໍແລ່ນມາຮອດກາຍກາງຂົວໃກ້ຝັ່ງ ເມືອງປາກເຊ ຍັງປະມານ 100 ກວ່າແມັດ ລົດຄັນດັ່ງກ່າວໄດ້ເກີດເສຍຫຼັກໄປຕຳເອົາລົດວີໂກ້ໝາຍເລກທະບຽນ (ກກ 0117 ຈຳປາສັກ) ທີ່ກຳລັງແລ່ນສວນທາງໂຟ້ງໄປຢູ່ອີກຂ້າງຂອງຂົວແລ້ວລົດຄັນດັ່ງກ່າວເຈືອກໄປຕຳເອົາຮົ້ວກຳແພງກັ້ນຂົວສອງຊັ້ນທະລຸຕົກລົງຫາດກາງນ້ຳບ້ານໂພນກຸງ ເຮັດໃຫ້ຜູ້ທີ່ນັ່ງຢູ່ໃນລົດພວງຄັນດັ່ງກ່າວ 2 ຄົນເສຍຊີວິດຄາທີ່ ສ່ວນຜູ້ຂັບບາດເຈັບເລັກໜ້ອຍ ຊຶ່ງທັງໝົດນັ້ນແມ່ນເປັນຄົນສັນ ຊາດໄທສ່ວນລົດວີໂກ້ທີ່ມີຄົນຂັບພຽງຄົນດຽວປອດໄພ ແລະ ເສຍຫາຍເລັກນ້ອຍ.
ພາຍຫຼັງທີ່ເຈົ້າໜ້າທີ່ກ່ຽວຂ້ອງໄດ້ລົງຕິດຕາມກວດກາ ແລະ ຊ່ວຍເຫຼືອເອົາຜູ້ລອດຊີວິດ ແລະ ຜູ້ທີ່ເສຍຊີວິດໃນອຸບັດເຫດຄັ້ງນີ້ຂຶ້ນມາໄດ້ສຳເລັດໄດ້ໃຫ້ຮູ້ວ່າ: ລົດພວງດັ່ງກ່າວແມ່ນເປັນລົດທີ່ຮັບໃຊ້ຂົນສົ່ງສິນຄ້າໃຫ້ກັບບໍລິສັດໃດໜຶ່ງຈາກປະເທດໄທ ຊຶ່ງອຸປະກອນເອເລັກໂຕຣນິກເພື່ອມາຮັບໃຊ້ໃຫ້ແກ່ໂຄງການກໍ່ສ້າງເຂື່ອນໄຟຟ້າເຊນ້ຳນ້ອຍທີ່ແຂວງເຊກອງ ຊຶ່ງຍັງບໍ່ທັນສາມາດປະເມີນຄວາມເສຍຫາຍໄດ້ ແລະ ສາເຫດຂອງອຸບັດເຫດຄັ້ງນີ້ແມ່ນຍັງຢູ່ໃນຂັ້ນຕອນການສືບສວນສອບສວນຂອງເຈົ້າໜ້າທີ່ ແຕ່ທີ່ແນ່ນອນອຸບັດເຫດຄັ້ງນີ້ຖືເປັນຄັ້ງຮຸນແຮງໃນຮອບຫຼາຍປີ ແລະ ສ້າງຄວາມເສຍຫາຍຕໍ່ຊີວິດ, ຊັບສິນຂອງບຸກຄົນ ແລະ ຊັບສິນຂອງລັດບໍ່ໜ້ອຍ.
ທີ່ມາ ເສດຖະກິດ-ສິງຄົມ