ສຳນັກຂ່າວຕ່າງປະເທດ ລາຍງານໃນວັນທີ 3 ມີນານີ້ວ່າ ທ່ານ ຊຸນສິນ ປະທານຄະນະກຳມະການບໍລິຫານ ບໍລິສັດ ນິວເຄລຍແຫ່ງຊາດຈີນ (CNNC) ໄດ້ເປີດເຜີຍວ່າ ຈີນໄດ້ເລີ່ມການກໍ່ສ້າງ ສະຖານີຈ່າຍໄຟຟ້າພະລັງງານນິວເຄລຍ ແບບລອຍນ້ຳ ຊຶ່ງຖືກອອກແບບ ໃຫ້ເປັນແຫລ່ງພະລັງງານ ສຳລັບຖານຂຸດເຈາະນ້ຳມັນ ແລະ ອາຍແກັສທຳມະຊາດ ພ້ອມທັງເປັນແຫລ່ງສະໜອງພະລັງງານ ໃນການພັດທະນາເກາະດອນ ແລະ ພື້ນທີ່ຫ່າງໄກສອກຫລີກຕື່ມອີກ ໂດຍມີກຳນົດໃຫ້ສາມາດດຳເນີນງານໄດ້ ພາຍໃນປີ 2019.

ປັດຈຸບັນ ຈີນມີໂຮງງານໄຟຟ້າພະລັງງານນິວເຄລຍ ເທິງແຜ່ນດິນໃຫຍ່ ທີ່ກຳລັງເປີດໃຊ້ງານຢູ່ ຈຳນວນ 30 ແຫ່ງ ຊຶ່ງມີກຳລັງການຜະລິດສຸດທິ 28.3 ກິກະວັດ ແລະ ສ່ວນທີ່ເຫລືອອີກຈຳນວນ 24 ແຫ່ງ ແມ່ນຢູ່ລະຫວ່າງການກໍ່ສ້າງ ຄາດວ່າຈະສາມາດຜະລິດໄຟຟ້າໄດ້ອີກ 26.7 ກິກະວັດ ໂດຍລັດຖະບານຈີນ ໄດ້ຕັ້ງເປົ້າໝາຍ ເພີ່ມປະລິມານການຜະລິດລວມ ໃຫ້ໄດ້ 58 ກິກະວັດ ພາຍໃນປີ 2020.