ສຳນັກຂ່າວຕ່າງປະເທດ ລາຍງານໃນວັນທີ 29 ກຸມພາຜ່ານມານີ້ວ່າ ທ່ານ ສືຈີ້ນຜິງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຈີນ, ປະທານປະເທດຈີນ ໄດ້ໃຫ້ການຕ້ອນຮັບ ທ່ານ ຮ່ວາງບິ່ງກວນ ກຳມະການສູນກາງພັກ, ຫົວໜ້າຄະນະພົວພັນການຕ່າງປະເທດສູນກາງ, ທູດພິເສດຂອງ ສະຫາຍເລຂາທິການໃຫຍ່ ຄະນະບໍລິຫານງານສູນກາງ ພັກກອມມູນິດຫວຽດນາມ ຢູ່ນະຄອນຫລວງປັກກິ່ງ ເພື່ອແຈ້ງຜົນສຳເລັດຂອງ ກອງປະຊຸມໃຫຍ່ຄັ້ງທີ 12 ພັກກອມມູນິດຫວຽດນາມ ໃຫ້ການນຳພັກກອມມູນິດຈີນໄດ້ຮັບຊາບ.
ທັງສອງຝ່າຍ ໄດ້ຢືນຢັນຄືນ ຖືເປັນສຳຄັນການພົວພັນລະຫວ່າງສອງປະເທດຈີນ – ຫວຽດນາມ ແລະ ຫວັງວ່າ, ສອງຝ່າຍເພີ່ມທະວີ ຄວາມໄວ້ເນື້ອເຊື່ອໃຈດ້ານການເມືອງ, ແລກປ່ຽນຂັ້ນສູງ, ຊຸກຍູ້ການຮ່ວມມືດ້ານຍຸດທະສາດ, ເພີ່ມທະວີການແລກປ່ຽນບົດຮຽນ, ແກ້ໄຂຄວາມບໍ່ລົງລອຍກັນ, ແນໃສ່ຊຸກຍູ້ການພົວພັນລະຫວ່າງສອງພັກ, ສອງລັດ ໃຫ້ພັດທະນາຢ່າງມີສະຖຽນລະພາບ ແລະ ປອດໃສໃນໄລຍະໃໝ່.