ສຳນັກຂ່າວຕ່າງປະເທດ ລາຍງານໃນວັນທີ 19 ກຸມພານີ້ວ່າ ໃນມື້ວານນີ້ (18 ກຸມພາ) ສານນະຄອນຫລວງແບກແດດ ປະເທດອີຣັກ ໄດ້ພິພາກສາປະຫານຊີວິດຜູ້ຖືກຫາ ທີ່ເປັນສະມາຊິກກຸ່ມລັດອິດສະລາມ ຫລື ໄອເອັສ ຈຳນວນ 40 ຄົນ ໃນຂໍ້ຫາສັງຫານໝູ່ທະຫານອີຣັກ ປະມານ 1,700 ຄົນ ທີ່ພວກເຂົາຈັບກຸມໄດ້ ໃນລະຫວ່າງບຸກຍຶດດິນແດນ ທາງພາກເໜືອຂອງອີຣັກ ໃນປີ 2014 ທີ່ຜ່ານມາ.
ທ່ານ ອັບດູນ-ຊັດຕາ ອັນ-ເບີກດາ ໂຄສົກສະພາຍຸຕິທຳສູງສຸດຂອງອີຣັກ ໄດ້ອ້າງຄຳຖະແຫລງຂອງ ສານອາຍານະຄອນຫລວງແບກແດດ ລະບຸວ່າ ສະມາຊິກໄອເອັສທັງ 40 ຄົນ ຖືກພິພາກສາປະຫານຊີວິດ ໃນຂໍ້ຫາກໍ່ການຮ້າຍ ແຕ່ມີຈຳເລີຍອີກ 7 ຄົນ ທີ່ໄດ້ຮັບການຊຳລະຄະດີ ແລະ ຖືກປ່ອຍຕົວເປັນອິດສະຫລະ ເນື່ອງຈາກຂາດຫລັກຖານ.
ແນວໃດກໍຕາມ ນັກໂທດປະຫານຊີວິດທັງ 40 ຄົນ ຈະຖືກພິຈາລະນາທົບທວນຄຳພິພາກສາ ໂດຍສານອຸທອນອີກຂັ້ນໜຶ່ງ ເນື່ອງຈາກກົດໝາຍອີຣັກ ໃຫ້ສິດອຸທອນແບບອັດຕະໂນມັດ ເຖິງແມ່ນຈຳເລີຍຈະບໍ່ຍື່ນຄຳຮ້ອງກໍຕາມ.