ສຳນັກຂ່າວຕ່າງປະເທດ ລາຍງານໃນວັນທີ 15 ກຸມພາຜ່ານມານີ້ວ່າ ສື່ມວນຊົນອີຣ່ານ ໄດ້ຖະແຫລງຂ່າວກ່ຽວກັບ ທ່ານ Masoud Jazayeri ຮອງຫົວໜ້າເສນາທິການໃຫຍ່ ກອງທັບອີຣ່ານ ໄດ້ອອກມາກ່າວເຕືອນ ກອງທັບຂອງ ອາຣັບບີ ຊາອຸດິດ ຫ້າມບໍ່ໃຫ້ຈັດສົ່ງທະຫານຂອງຕົນ ເຂົ້າໄປໃນດິນແດນຂອງຊີຣີ ຊຶ່ງຄຳກ່າວເຕືອນນີ້ ຖືກຍົກອອກມາຖະແຫລງ ພາຍຫລັງທີ່ລັດຖະບານອາຣັບບີ ຊາອຸດິດ ໄດ້ຈັດສົ່ງເຮືອບິນສູ້ຮົບ ເຂົ້າໄປປະຕິບັດພາລະກິດໂຈມຕີ ຢູ່ປະເທດຊີຣີ ເມື່ອບໍ່ດົນມານີ້.
ທ່ານ Masoud Jazayeri ຖະແຫລງວ່າ ອີຣ່ານຈະບໍ່ປະໃຫ້ສະພາບການຢູ່ຊີຣີ ຜັນແປ່ຕາມຄວາມຫວັງຂອງບັນດາປະເທດ ທີ່ໃຫ້ການສະໜັບສະໜູນກຸ່ມຕິດອາວຸດກະບົດ ແລະ ກຸ່ມລັດອິດສະລາມ ພ້ອມທັງລະບຸວ່າ ຈະນຳໃຊ້ທຸກມາດຕະການຈຳເປັນ ໃນເມື່ອເຖິງເວລາທີ່ເໝາະສົມ ໂດຍທ່ານຍັງກ່າວຫາອີກວ່າ ບັນດາບຸກຄົນໃນກຸ່ມກໍ່ການຮ້າຍ ທີ່ກຳລັງເຄື່ອນໄຫວຢູ່ຊີຣີນັ້ນ ອາດຈະແມ່ນກຳລັງຂອງອາຣັບບີ ຊາອຸດິດ ແລະ ສະຫະລັດອາເມຣິກາ.