ກອງ​ປະຊຸມ​ຄະນະ​ປະຈຳ​ສະພາ​ແຫ່ງ​ຊາດ ​ປະຈຳ​ເດືອນ​ກຸມພາ 2016 ຈັດ​ຂຶ້ນ​ລະຫວ່າງ​ວັນ​ທີ 15-16 ກຸມພາ 2016 ທີ່​ສະພາ​ແຫ່ງຊາດ ໂດຍ​ເປັນ​ປະທານ​ຂອງ​ທ່ານນາງ ປານີ ຢາ​ທໍ່​ຕູ້ ປະທານ​ສະພາ​ແຫ່ງ​ຊາດ ມີ​ບັນດາ​ຄະນະ​ປະຈຳ ຄະນະ​ກຳມາ​ທິ​ການ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ກອງ​ປະຊຸມ​ໄດ້​ຮັບ​ຟັງ​ການລາຍ​ງານ ແລະ ພິຈາລະນາຫຼາຍ​ບັນຫາ​ສຳຄັນ​ ເປັນຕົ້ນ​ແມ່ນ ການ​ສະເໜີ​ແຕ່ງຕັ້ງ​ຕຳແໜ່ງ​ບໍ​ລິຫານ​ປະເພດ 2 ແລະ ການ​ສະເໜີ​ແຕ່ງຕັ້ງ​ສະມາຊິກ​ສະພາ​ຜູ້ພິພາກສາ​ສານ​ປະຊາຊົນ​ສູງ​ສູດ ຄວາມ​ຄືບ​ໜ້າ​ກ່ຽວ​ກັບ​ການ​ປຸກ​ສ້າງ​ສະພາ​ແຫ່ງ​ຊາດຫຼັງ​ໃໝ່ ຜົນ​ການ​ຮຽບ​ຮຽງ​ກົດໝາຍ​ທີ່​ກອງ​ປະຊຸມ​ສະໄໝ​ສາມັນເທື່ອ​ທີ 10 ຂອງ​ສະພາ​ແຫ່ງ​ຊາດ ຊຸດ​ທີ VII ຮັບຮອງ​ຄື: ກົດໝາຍວ່າ​ດ້ວຍ​ການ​ປ້ອງ​ກັນ​ຊາດ ກົດໝາຍວ່າ​ດ້ວຍ​ພະນັກງານ-ລັດຖະ​ກອນ ແລະ ກົດໝາຍ​ວ່າ​ດ້ວຍການ​ລົງທຶນ​ຂອງ​ລັດ ພິຈາລະນາຜົນ​ການ​ຄົ້ນຄວ້າ​ຄຳ​ສະເໜີ​ຂອງລັດຖະບານ ເພື່ອ​ຂໍ​ດັດ​ປັບ​ແຜນການ​ລົງທຶນ​ຂອງ​ລັດ ສົກ​ປີ 2015 -2016 ຢູ່​ແຂວງ​ໄຊ​ຍະ​ບູ​ລີ ພາລະບົດບາດ ສິດ ແລະ ໜ້າທີ່​ຂອງສະພາ​ປະຊາຊົນ​ຂັ້ນ​ແຂວງ ​ກ່ຽວກັບ​ການ​ພິຈາລະນາ​ຮັບຮອງ​ເອົາໂຄງການ​ລົງທຶນ ຕາມ​ກົດໝາຍວ່າ​ດ້ວຍ​ການ​ລົງທຶນ​ຂອງ​ລັດ ແລະ ໂຄງການ​ກໍ່ສ້າງ​ຫໍ​ມູນເຊື້ອ ກອງຮ້ອຍ​ລາດ​ຊະ​ວົງ​ ສະໄໝ​ຜູ້ນຳ​ຮຸ່ນ​ທຳ​ອິດ ຢູ່​ຖ້ຳ​ແມ​ລາວ​ຮຸ່ງ-ພຽງ​ສາ ເມືອງ​ຊຽງ​ຄໍ້ ແຂວງ​ຫົວພັນ ພິຈາລະນາ​ນຳ​ສົ່ງ​ຮ່າງ​ມະຕິ​ຕົກລົງ​ຂອງ​ສະພາ​ແຫ່ງ​ຊາດ ສຳລັບ​ໂຄງການ​ໄຟຟ້າ​ພະລັງງານ​ນ້ຳ​ອູ ໄລຍະ​ທີ 2 ແລະ ບັນຫາ​ສຳຄັນ​ອື່ນໆ​ອີກ​ຈຳນວນ​ໜຶ່ງ.