ມີລາຍງານວ່າ ຜູ້ໃຊ້ໂທລະສັບໄອໂຟນ 6 ທີ່ນຳເຄື່ອງໄປສ້ອມແປງກັບຮ້ານທົ່ວໄປ ຊຶ່ງບໍ່ແມ່ນສູນສ້ອມແປງທີ່ໄດ້ຮັບອະນຸຍາດຈາກບໍລິສັດແອບເປິລ ພົບບັນຫາໂທລະສັບບໍ່ເຮັດວຽກ ອາການທີ່ວ່ານີ້ ເກີດຂຶ້ນກັບໂທລະສັບທີ່ເຈົ້າຂອງໄດ້ອັບເດດລະບົບປະຕິບັດການໄອໂອເອສ 9 ແລ້ວ ແລະບໍ່ພຽງແຕ່ບໍ່ເຮັດວຽກເທົ່ານັ້ນ ຂໍ້ມູນໃນໂທລະສັບຈະຫາຍໄປໂດຍບໍ່ສາມາດກູ້ກັບຄືນມາໄດ້.
ໜັງສືພິມເດິກາດຽນ ລາຍງານວ່າ ບັນຫາດັ່ງກ່າວເກີດຂຶ້ນເມື່ອຜູ້ໃຊ້ໄອໂຟນ 6 ນຳເຄື່ອງໄປສ້ອມແປງປຸ່ມໂຮມ ຊຶ່ງມີເຊັນເຊີສະແກນລາຍນິ້ວມືທີ່ຮຽກວ່າ Touch ID ກັບຊ່າງທີ່ບໍ່ໄດ້ຮັບອະນຸຍາດຈາກບໍລິສັດແອບເປິລ ຈາກນັ້ນເມື່ອເຄື່ອງອັບເດດໄອໂອເອສ 9 ກໍຈະປາກົດຂໍ້ຄວາມ “error 53” ເຮັດໃຫ້ເຄື່ອງໃຊ້ວຽກບໍ່ໄດ້ແລະຂໍ້ມູນທຸກຢ່າງໃນເຄື່ອງຫາຍໄປບໍ່ສາມາດກູ້ກັບມາຄືນໄດ້.
ກໍລະນີທີ່ເກີດຂຶ້ນເຮັດໃຫ້ຜູ້ໃຊ້ໄອໂຟນ 6 ຈຳນວນຫຼາຍເຂົ້າໄປສົນທະນາເລື່ອງນີ້ໃນກຸ່ມສົນທະນາຂອງລູກຄ້າແອບເປິລ ບາງຄົນສະແດງຄວາມຜິດຫວັງທີ່ບໍ່ສາມາດກູ້ຮູບພາບແລະເອກະສານສຳຄັນໃນໂທລະສັບກັບຄືນມາໄດ້.
ດ້ານບໍລິສັດແອບເປິລ ລະບຸວ່າ ຊອຟແວຂອງໄອໂຟນຈະກວດສອບວ່າການສ້ອມແປງເຄື່ອງເຮັດໂດຍຜູ້ທີ່ໄດ້ຮັບອະນຸຍາດຈາກແອບເປິລຫຼືບໍ່ ພ້ອມແນະນຳໃຫ້ລູກຄ້າທີ່ປະສົບບັນຫານີ້ຕິດຕໍ່ສູນບໍລິການແອບເປິລເພື່ອໃຫ້ເຈົ້າໜ້າທີ່ຊ່ວຍດຳເນີນການແກ້ໄຂໃຫ້ຕໍ່ໄປ.