ກະ­ຊວງ​ກະ­ຊວງ​ການ​ເງິນ​ສ ເກົາ­ຫຼີ​ຖະ­ແຫຼງ​ຂ່າວ​ໃນ​ວັນ 03 ກຸມ­ພາ​ທີ່​ຜ່ານ​ມາ​ວ່າ ລັດ­ຖະ­ບານ​ຈະ​ລະ­ດົມ​ເຄື່ອງ­ມື ແລະ ຊັບ­ພະ­ຍາ­ກອນ​ທີ່​ມີ​ຢູ່​ທັງ​ໝົດ​ເພື່ອ​ສົ່ງ­ເສີມ​ການ​ບໍ­ລິ­ໂພກ​ພາຍ​ໃນ​ປະ­ເທດ ແລະ ການ​ສົ່ງ​ອອກ​ໃນ​ໄຕ​ມາດ​ທຳ​ອິດ​ທີ່​ສິ້ນ​ສຸດ​ໃນ​ເດືອນ​ມີ­ນາ ແລະ ເພື່ອ​ສົ່ງ­ເສີມ​ການ​ຈ້າງ​ວຽກ​ໃໝ່ ໂດຍ​ຈະ​ຈັດ​ສັນ​ງົບ­ປະ­ມານ​ລັດ­ຖະ­ບານ ແລະ ສິນ​ເຊື່ອ​ດອກ​ເບ້ຍ​ຕ່ຳ​ໃຫ້​ແກ່​ຂະ­ແໜງ​ທຸ­ລະ​ກິດ​ຕື່ມ​ອີກ 21,5 ພັນ​ຕື້​ວອນ ເພີ່ມ​ການ​ໃຊ້​ຈ່າຍ​ພາກ​ລັດ​ອີກ 6 ພັນ​ຕື້​ວອນ ເພີ່ມ​ການ​ປ່ອຍ​ສິນ​ເຊື່ອ​ດອກ​ເບ້ຍ​ຕ່ຳ​ໃຫ້​ແກ່​ຂະ­ແໜງ​ທຸ­ລະ​ກິດ 15,5 ພັນ​ຕື້​ວອນ ແລະ ຂະ­ຫຍາຍ​ໂຄງ ການ​ຫຼຸດ​ພາ­ສີ​ບໍ­ລິ­ໂພກ​ລົດ​ສ່ວນ​ບຸກ­ຄົນ​ລົງ 1,5% ໄປ​ຈົນ​ເຖິງ​ທ້າຍ​ເດືອນ​ມິ­ຖຸ­ນາ​ຈາກ​ເດີມ​ທີ່​ສິ້ນ​ສຸດ​ໃນ​ເດືອນ​ທັນ­ວາ​ປີ​ທີ່​ຜ່ານ​ມາ.

ທ່ານ ລີ ຊານ​ວູ ລັດ­ຖະ­ມົນ­ຕີ​ຊ່ວຍ​ວ່າ­ການ​ກະ­ຊວງ​ການ​ເງິນ​ກ່າວ​ວ່າ ທາງ​ການ​ຄາດ​ວ່າ ມາດ​ຕະ­ການ​ນີ້​ຈະ​ຊ່ວຍ​ກະ​ຕຸ້ນ​ໃຫ້​ເສດ­ຖະ­ກິດ​ໄຕ​ມາດ​ທຳ​ອິດ​ເຕີບ​ໂຕ​ໄດ້ 0,2% ເພື່ອ​ສົ່ງ​ຜົນ​ຕໍ່​ເນື່ອງ​ໄປ​ຍັງ​ໄຕ​ມາດ​ອື່ນໆ ຫຼັງ​ຈາກ​ທະ­ນາ­ຄານ​ກາງ​ສ ເກົາ­ຫຼີ​ປັບ​ຫຼຸດ​ຄາດ​ການ​ຂະ­ຫຍາຍ­ຕົວ​ຂອງ​ຕົວ​ເລກ​ລວມ​ຜະ­ລິດ​ຕະ​ພັນ​ລວມ​ພາຍ​ໃນ (ຈີ​ດີ​ພີ) ປີ​ນີ້​ຈາກ 3,2% ເຫຼືອ 3,0% ເພາະ​ເຫັນ​ສັນ­ຍານ​ຫົດ​ຕົວ​ໃນ​ສປ ຈີນ ຊຶ່ງ​ເປັນ​ຕະ­ຫຼາດ​ສົ່ງ​ອອກ​ໃຫຍ່​ສຸດ​ຂອງ​ປະ­ເທດ.

ປີ 2015 ທີ່​ຜ່ານ​ມາ ເສດ​ຖະ​ກິດ​ສ ເກົາ­ຫຼີ​ຂະ­ຫຍາຍ­ຕົວ​ຕ່ຳ​ສຸດ​ນັບ​ຕັ້ງ­ແຕ່​ປີ 2012 ເນື່ອງ​ຈາກ​ການ​ສົ່ງ​ອອກ​ຊຶ່ງ​ຄວບ​ຄຸມ​ອັດ­ຕາ​ສ່ວນ​ຈີ​ດີ​ພີ​ປະ­ເທດ​ກວ່າ​ເຄິ່ງ​ໜຶ່ງ​ຫຼຸດ​ລົງ​ເຖິງ 8% ຫົດ​ຕົວ​ຄັ້ງ​ທຳ​ອິດ​ໃນ​ຮອບ 3 ປີ ຫຼ້າ​ສຸດ​ເດືອນ​ມັງ­ກອນ​ປີ​ນີ້​ການ​ສົ່ງ​ອອກ​ຫຼຸດ​ເຖິງ18,5% ຈາກ​ເດືອນ​ດຽວ​ກັນ​ຂອງ​ປີ​ກ່ອນ ຖື​ວ່າ​ຫຼຸດ​ລົງ​ຫຼາຍ​ທີ່​ສຸດ​ໃນ​ຮອບ​ກວ່າ 6 ປີ (ຕາມ​ຂ່າວ​ຕ່າງ­ປະ­ເທດ).

ທີ່ມາ: