ສຳນັກຂ່າວຕ່າງປະເທດ ລາຍງານໃນວັນທີ 1 ກຸມພານີ້ວ່າ ມື້ວານນີ້ (31 ມັງກອນ) ເກີດເຫດລະເບີດຂຶ້ນ 3 ຄັ້ງ ທາງຕອນໃຕ້ຂອງ ນະຄອນຫລວງດາມັດກັດ ປະເທດຊີຣີ ເປັນເຫດເຮັດໃຫ້ມີຜູ້ເສຍຊີວິດ ຫລາຍເຖິງ 60 ຄົນ ແລະ ມີຜູ້ໄດ້ຮັບບາດເຈັບອີກກ່ວາ 110 ຄົນ ໂດຍລະເບີດລູກທຳອິດ ເປັນລະເບີດທີ່ເຊື່ອງໄວ້ໃນລົດ ແຕກຂຶ້ນຢູ່ໃກ້ກັບ ບໍລິເວນມັດສະຍິດ ຊາຢິດາ ເຊນາບ ຂອງຊາວມຸດສະລິມນິກາຍຊີອະ ຫລັງຈາກນັ້ນ ກໍມີມືລະເບີດຂ້າຕົວຕາຍ ຈູດລະເບີດອີກ 2 ຄົນ ໃນຂະນະທີ່ເຈົ້າໜ້າທີ່ ກຳລັງທຳການຊ່ວຍເຫລືອ ຜູ້ເຄາະຮ້າຍຈາກລະເບີດລູກທຳອິດ.

ຫລັງຈາກເກີດເຫດ ກຸ່ມລັດອິດສະລາມ ຫລື ກຸ່ມໄອເອັສ ໄດ້ອອກມາຖະແຫລງ ຜ່ານສື່ສັງຄົມອອນລາຍຂອງຕົນວ່າ ເປັນຜູ້ຢູ່ເບື້ອງຫລັງການກໍ່ເຫດດັ່ງກ່າວ ຊຶ່ງຄາດວ່າອາດເປັນການກໍ່ເຫດ ເພື່ອປັ່ນປຸ່ວນສະຖານະການ ໃນຂະນະທີ່ກອງປະຊຸມເຊີແນວ ກ່ຽວກັບບັນຫາຊີຣີ ກຳລັງຈະໄຂຂຶ້ນຢູ່ປະເທດສະວິດ.