ກະຊວງສຶກສາທິການ ແລະ ກິລາ ຕາງໜ້າໃຫ້ລັດຖະບານ ສປປ ລາວ ປະດັບຫຼຽນກາແຮງງານ ແລະ ມອບໃບຍ້ອງຍໍ ໃຫ້ກົມກອງລວມໝູ່, ຄະນະນຳ, ກຳມະການ, ຄູເຝິກ ແລະ ນັກກິລາທີມຊາດລາວ ທີ່ສ້າງຜົນງານຄວ້າ 4 ຫຼຽນເງິນ ແລະ 25 ຫຼຽນທອງ ໃນການເຂົ້າຮ່ວມງານມະຫາກຳກິລາຊີເກມ ຄັ້ງທີ 28 ທີ່ປະເທດສິງກະໂປ ເມື່ອກາງປີ 2015 ຜ່ານມາ, ເຊິ່ງຜົນງານດັ່ງກ່າວ ຖືເປັນການສ້າງຊື່ສຽງ ແລະ ກຽດສັກສີໃຫ້ກັບປະເທດຊາດໃນເວທີພາກພື້ນ ແລະ ສາກົນ.
ພິທີປະດັບຫຼຽນກາແຮງງານ ແລະ ຍ້ອງຍໍດັ່ງກ່າວ ໄດ້ຈັດຂຶ້ນໃນຕອນບ່າຍວັນທີ 28 ມັງກອນ ຜ່ານມາ ທີ່ໂຮງແຮມລ້ານຊ້າງ ນະຄອນຫຼວງວຽງຈັນ, ໂດຍໃຫ້ກຽດເຂົ້າຮ່ວມ ແລະ ປະດັບຫຼຽນຂອງ ທ່ານ ບົວລານ ສິລິປັນຍາ ລັດຖະມົນຕີຊ່ວຍວ່າການ ກະຊວງສຶກສາທິການ ແລະ ກິລາ, ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງ ສສກ, ທັງເປັນຮອງປະທານ ແລະ ເລຂາທິການຄະນະກຳມະການໂອແລມປິກແຫ່ງຊາດລາວ ແລະ ທ່ານ ແສງພອນ ພົນອາມາດ ຫົວໜ້າກົມກິລາລະດັບສູງ ກະຊວງ ສສກ, ພ້ອມດ້ວຍບັນດາຫົວໜ້າກົມ-ຮອງກົມທີ່ກ່ຽວຂ້ອງ, ຄູເຝິກ ແລະ ນັກກິລາ ເຂົ້າຮ່ວມ.
ໂອກາດນີ້, ທ່ານ ສິງຄຳ ນາລິນ ຮອງຫົວໜ້າກົມກິລາລະດັບສູງ ກະຊວງສຶກສາທິການ ແລະ ກິລາ, ທັງເປັນຫົວໜ້າຄະນະນັກກິລາເຂົ້າຮ່ວມຊີເກມ ຄັ້ງທີ 28 ໄດ້ລາຍງານໃຫ້ຮູ້ວ່າ: ສຳລັບການເຂົ້າ ຮ່ວມງານກິລາຊີເກມ ຄັ້ງທີ 28 ທີ່ປະເທດສິງກະໂປ ເມື່ອກາງປີ 2015 ຜ່ານມາ, ສປປ ລາວ ສົ່ງຄະນະນຳ, ຄູເຝິກແລະ ນັກກິລາເຂົ້າຮ່ວມທັງໝົດ 318 ຄົນ (ຄູເຝິກ 97 ຄົນ ແລະ ນັກກິລາ 183 ຄົນ) ໃນ 20 ປະເພດກິລາຄື: ເປຕັງ, ເທຄວັນໂດ, ວູຊູ, ຢູໂດ, ກະຕໍ້, ບິນລຽດ-ສະນຸກເກີ້, ລົດຖີບ, ຍິງທະນູ, ມວຍສາກົນ, ປັນຈັກສີລັດ, ແລ່ນ-ລານ, ລອຍນ້ຳ, ເຕະບານ, ດອກປີກໄກ່, ເທັນນິສ, ຍິງປືນ, ປິ່ງປ່ອງ, ກ໊ອຟ, ຣັກບີ້ ແລະ ຟັນດາບ ພ້ອມຕັ້ງເປົ້າຈະສູ້ຊົນຍາດໃຫ້ໄດ້ຢ່າງໜ້ອຍ 5 ຫຼຽນຄຳ. ແຕ່ຜ່ານການແຂ່ງຂັນຕົວຈິງຜົນປາກົດວ່າ ທັບນັກກິລາລາວເຮົາຍາດມາໄດ້ພຽງແຕ່ 4 ຫຼຽນເງິນ ແລະ 25 ຫຼຽນທອງ ລວມ 29 ຫຼຽນ ຈັດຢູ່ອັນດັບທີ 9 ຂອງຕາຕະລາງ ຈາກ 11 ປະເທດເຂົ້າຮ່ວມແຂ່ງຂັນ ຕ່ຳກວ່າເປົ້າໝາຍທີ່ຕັ້ງໄວ້.
ຕໍ່ກັບຜົນງານດັ່ງກ່າວ, ກະຊວງ ສສກ ຈຶ່ງໄດ້ຕາງໜ້າໃຫ້ລັດຖະບານ ປະດັບຫຼຽນກາແຮງງານ ຈຳນວນ 97 ໜ່ວຍ, ມີ 88 ຄົນ ແລະ 9 ກົມກອງ ພ້ອມກັບມອບໃບຍ້ອງຍໍຂັ້ນກະຊວງ ຈຳນວນ 219 ໃບ, ມີ 198 ຄົນ ແລະ 11 ກົມກອງ ໃຫ້ກົມກອງລວມໝູ່, ຄະນະນຳ, ກຳມະການ, ຄູເຝິກ ແລະ ນັກກິລາທີມຊາດລາວ ທີ່ມີຜົນງານ, ຄຸນງາມຄວາມດີໃນການຊີ້ນຳ-ນຳພາ ແລະ ເຝິກຊ້ອມນັກກິລາເຂົ້າຮ່ວມ ງານມະຫາກຳກິລາຊີເກມ ຄັ້ງທີ 28 ທີ່ປະເທດສິງກະໂປ.
ໃນໂອກາດດຽວກັນ, ຍັງໄດ້ປະດັບຫຼຽນໄຊແຮງງານ ຊັ້ນ II ຈຳນວນ 9 ທ່ານ ແລະ 4 ກົມກອງ; ປະດັບຫຼຽນໄຊແຮງງານ ຊັ້ນ III ຈຳນວນ 9 ທ່ານ; ປະດັບຫຼຽນກາແຮງງານ ຈຳນວນ 18 ທ່ານ ແລະ ມອບໃບຍ້ອງຍໍຂັ້ນກະຊວງ ຈຳນວນ 19 ທ່ານ ທີ່ມີຜົນງານດີເດັ່ນປະກອບສ່ວນເຂົ້າຮ່ວມການແຂ່ງຂັນກິລາອາຊຽນຫາດຊາຍ ຄັ້ງທີ 4 ປີ 2014 ທີ່ແຂວງພູເກັດ ປະເທດໄທ ໃນລະຫວ່າງວັນທີ 14-23 ພະຈິກ 2014, ເຊິ່ງສາມາດຍາດມາໄດ້ 2 ຫຼຽນຄຳ, 2 ຫຼຽນເງິນ ແລະ 8 ຫຼຽນທອງ.
ທີ່ມາ: ກະຊວງສຶກສາທິການ ແລະ ກິລາ