ທັບນັກກິລາຍິງທະນູທີມຊາດລາວ ຊຸດກຽມເຂົ້າຮ່ວມງານມະຫາກຳກິລາຊີເກມ ຄັ້ງທີ 29 ທີ່ປະເທດມາເລເຊຍ ເປັນເຈົ້າພາບ ໃນປີ 2017 ສາມາດຍາດໄດ້ 1 ຫຼຽນເງິນ ແລະ 1 ຫຼຽນທອງ ໃນການແຂ່ງຂັນກິລາຍິງທະນູ ຊີງແຊ້ມ ອາຊຽນ ຄັ້ງທີ 5 ທີ່ສະຫະພາບມຽນມາ ຮັບກຽດເປັນເຈົ້າພາບ ໃນລະຫວ່າງວັນທີ 25-27 ມັງກອນ 2016.
ອີງຕາມການລາຍງານຂອງ ທ່ານ ອາເລັ່ງ ໄຊແສນສຸກ ຄູເຝິກກິລາຍິງທະນູທີມຊາດລາວ ໃນຕອນເຊົ້າວັນທີ 27 ມັງກອນ ຜ່ານມາ ໃຫ້ຮູ້ວ່າ: ສຳລັບການເຂົ້າຮ່ວມການແຂ່ງຂັນກິລາຍິງທະນູ ຊີງແຊ້ມ ອາຊຽນ ຄັ້ງທີ 5 ທີ່ສະຫະພາບມຽນມາ ຮັບກຽດເປັນເຈົ້າພາບ ໄດ້ສິ້ນສຸດລົງແລ້ວ ດ້ວຍຜົນງານຂອງທັບນັກກິລາຍິງທະນູລາວ ທີ່ສົ່ງເຂົ້າຮ່ວມແຂ່ງຂັນ 6 ຄົນ, ຍິງ 3 ຄົນ ສາມາດຍາດໄດ້ພຽງ 1 ຫຼຽນເງິນ ຈາກປະເພດທີມຊາຍ ລາຍການ ທະນູຄອມປາວ ຫຼັງເສຍໃຫ້ນັກກິລາ ຈາກ ສສ ຫວຽດນາມ ສ່ວນຫຼຽນທອງ ຕົກເປັນຂອງເຈົ້າພາບ ມຽນມາ. ນັກກິລາ ປະເພດທີມຍິງ ລາຍການທະນູຣີເຄີບ ກໍ່ຍາດໄດ້ 1 ຫຼຽນທອງ, ສ່ວນຫຼຽນຄຳ ແມ່ນນັກກິລາ ສສ ຫວຽດນາມ ແລະ ຫຼຽນເງິນແມ່ນນັກກິລາເຈົ້າພາບ.
ໃນການແຂ່ງຂັນກິລາຍິງທະນູ ຊີງແຊ້ມ ອາຊຽນ ຄັ້ງທີ 5 ທີ່ສະຫະພາບມຽນມາ ແມ່ນມີ 5 ປະເທດເຂົ້າຮ່ວມ ປະກອບມີ ລາວ, ໄທ, ຫວຽດນາມ, ສິງກະໂປ ແລະ ມຽນມາ ເຈົ້າພາບ ສະເພາະນັກກິລາລາວ ແມ່ນໄດ້ສົ່ງນັກກິລາເຂົ້າຮ່ວມແຂ່ງຂັນທັງໝົດ 6 ຄົນ ປະກອບມີ ທ້າວ ທະນົງລິດ ສິລິຜົນ, ທ້າວ ດາລິຍະ, ທ້າວ ຄໍາຫວານ ວັນລີວົງ, ນາງ ກາລະດ້າ, ນາງ ເຈນ ກະໂບກສີ ແລະ ນາງ ປິ່ນມຸກ ແສນບຸດຕະລາດ, ໃນ 4 ລາຍການ ຄື: ປະເພດດຽ່ວຍິງ ແລະ ທີມຍິງ, ປະເພດດຽ່ວຊາຍ ແລະ ທີມຊາຍ ຈາກປະເພດທະນູ ຣີເຄີບ ແລະ ຄອມປາວ.
ທີ່ມາ: ກະຊວງສຶກສາທິການ ແລະ ກິລາ