ສຳນັກຂ່າວຕ່າງປະເທດ ລາຍງານໃນວັນທີ 28 ມັງກອນນີ້ວ່າ ລັດຖະບານສະວີເດັນ ກຽມເນທະເທດຜູ້ອົບພະຍົບ ປະມານ 80,000 ຄົນ ທີ່ເດີນທາງເຂົ້າປະເທດໃນປີ 2015 ຊຶ່ງຖືກລັດຖະບານປະຕິເສດຄຳຮ້ອງ ເພື່ອຂໍລີ້ໄພ ໂດຍທ່ານ ອັງເດີ ເຢມານ ລັດຖະມົນຕີວ່າການ ກະຊວງພາຍໃນ ປະເທດສະວີເດັນ ໄດ້ອອກຖະແຫລງໃນມື້ວານນີ້ (27 ມັງກອນ) ລະບຸວ່າ ຂະນະນີ້ລັດຖະບານ ໄດ້ຂໍໃຫ້ທາງຕຳຫລວດ ແລະ ໜ່ວຍງານທີ່ຄຸ້ມຄອງຜູ້ອົບພະຍົບ ກະກຽມສຳລັບການເນລະເທດແລ້ວ.

ທ່ານ ເຢມານ ກ່າວຕື່ມວ່າ ການເນລະເທດຜູ້ລີ້ໄພ ໂດຍປົກກະຕິແລ້ວ ແມ່ນຈະໃຊ້ເຮືອບິນໂດຍສານ ເປັນພາຫະນະ ຂັບອອກນອກປະເທດ, ແຕ່ໃນກໍລະນີນີ້ ອາດຕ້ອງໃຊ້ເຮືອບິນເຊົ່າເໝົາລຳ ເນື່ອງຈາກມີຈຳນວນຜູ້ຖືກເນລະເທດ ຈຳນວນຫລວງຫລາຍ.

ທັງນີ້ ສະວີເດັນ ໄດ້ເປີດປະເທດຮັບເອົາຜູ້ລີ້ໄພກ່ວາ 160,000 ຄົນ ໃນປີ 2015 ຊຶ່ງຖືເປັນປະເທດຕົ້ນໆ ໃນສະຫະພາບເອີຣົບ ເມື່ອປຽບທຽບກັບອັດຕາສ່ວນພົນລະເມືອງ ທີ່ມີຢູ່ພຽງແຕ່ 9.8 ລ້ານຄົນເທົ່ານັ້ນ ໂດຍມາດຕະການເນລະເທດດັ່ງກ່າວນີ້ ຈະເປັນການຂັບຜູ້ອົບພະຍົບ ຊຶ່ງສ່ວນໃຫຍ່ພາກັນຫລົບໜີ ຈາກໄພສົງຄາມ ຢູ່ປະເທດຊີຣີ, ອີຣັກ ແລະ ອັບການິສະຖານ ເຂົ້າມາເອີຣົບ ກັບຄືນໄປສູ່ຖິ່ນຖານເດີມ.