ພິທີ​ເປີດ​ການ​ກໍ່ສ້າງ​ສະຖານີດູດ​ນ້ຳຂອງ (Intake Tower) ໄລຍະ​ທີ I ຂອງ​ໂຮງງານ​ຜະລິດ​ນ້ຳປະປາທ່າ​ເດື່ອ ເມືອງ​ຫາດ​ຊາຍຟອງ ນະຄອນຫຼວງ​ວຽງ​ຈັນ ໂດຍມີ​ກຳລັງ​ການ​ຜະລິດ 20 ພັນແມັດ​ກ້ອນ​ຕໍ່​ວັນ ແມ່ນ​ໄດ້​ມີ​ຂຶ້ນໃນ​ວັນ​ທີ 11 ມັງກອນ 2016 ຢູ່ສະຖານີ​ດັ່ງກ່າວ ວັດ​ບ້ານ​ທ່າມ່ວງ ໂດຍ​ເຂົ້າ​ຮ່ວມ​ເປັນ​ປະທານເປີດ​ພິທີ​ມີ​ທ່ານ ຄຳ​ເຜີຍ ວົງສາຄຳ​ຜຸຍ ຜູ້ອຳນວຍການ​ໃຫຍ່​ ລັດ​ວິສາ​ຫະ​ກິດ​ນ້ຳ​ປະປາ ນວ.

ທ່ານ ສຸ​ທິນ ຄຽງ​ສົມບັດ ຫົວໜ້າ​ໂຄງການ​ໂຮງງານ​ຜະລິດນ້ຳ​ປະປາ​ທ່າ​ເດື່ອ ​ໄດ້​ລາຍ​ງານ​ໃຫ້ຊາບ​ກ່ຽວ​ກັບ​ໜ້າ​ວຽກ​ ຂອງ​ການກໍ່ສ້າງ​ສະຖານີ​ດູດ​ນ້ຳຂອງ (Intake Tower) ໄລຍະ​ທີ I ວ່າ ພິທີ​ເປີດ​ການ​ກໍ່ສ້າງ​ສະຖານີ​ດັ່ງກ່າວ ​ຂອງ​ໂຮງງານ​ນ້ຳ​ປະປາ​ທ່າເດື່ອ​ ທີ່​ມີ​ຄວາມ​ອາດ​ສາມາດ​ຜະລິດ​ນ້ຳ​ໄດ້ 20 ພັນ​ແມັດ​ກ້ອນຕໍ່​ວັນ​ແມ່ນ 1 ໂຄງການ​ທີ່​ນອນ​ຢູ່ໃນ​ໂຄງການ​ກໍ່ສ້າງ​ນ້ຳ​ປະປາ​ທ່າເດື່ອ ມີ​ມູນ​ຄ່າ​ທັງ​ໝົດ 19 ລ້ານໂດ​ລາ​ສະຫະລັດ ຫຼື ປະມານ 152 ຕື້​ກວ່າ​ກີບ ທີ່​ຈະ​ລົງມື​ກໍ່ສ້າງ​ໃນເດືອນ​ມັງກອນ​ນີ້ ແລະ ມີ​ໄລຍະການ​ກໍ່ສ້າງ ເປັນ​ເວລາ 6 ເດືອນຈຶ່ງ​ຈະ​ສຳເລັດ ສາມາດ​ຕອບ​ສະໜອງ​ການ​ບໍລິການ​ນ້ຳ​ປະປາ ​ໃຫ້ແກ່​ເຂດ​ພື້ນ​ທີ່​ນະຄອນຫຼວງ ແລະ ເຂດ​ໃກ້​ຄຽງ​ກວມ​ເອົາ 28 ໝູ່ບ້ານ ທີ່​ຂຶ້ນ​ກັບ​ເມືອງ​ຫາດ​ຊາຍຟອງ ແລະ ເມືອງ​ອ້ອມ​ຂ້າງ ໃນ​ພິທີ​ດັ່ງກ່າວ ​ແມ່ນ​ໄດ້​ເຮັດ​ພິທີ​ທາງສາສະໜາ ​ເພື່ອ​ເຮັດ​ໃຫ້​ວຽກ​ງານໃນ​ການ​ກໍ່ສ້າງ ​ໄດ້​ບັນລຸ​ໄປ​ຕາມຄາດໝາຍ​ທີ່​ວາງ​ໄວ້.