ສຳນັກຂ່າວຕ່າງປະເທດ ລາຍງານໃນວັນທີ 4 ມັງກອນນີ້ວ່າ ທ່ານ ໄມຕຣີພາລາ ສິຣິເສນາ ປະທານາທິບໍດີສີລັງກາ ໄດ້ອອກມາເປີດເຜີຍ ໃນວັນອາທິດທີ 3 ມັງກອນ ກ່ຽວກັບແຜນການ ກຽມມອບທີ່ດິນປຸກສ້າງ ໃຫ້ແກ່ປະຊາຊົນ ຫລາຍກ່ວາ 100,000 ຄົນ ໃນພື້ນທີ່ພາກເໜືອ ແລະ ພາກຕາເວັນອອກຂອງປະເທດ ທີ່ໄດ້ຮັບຜົນກະທົບ ຈາກເຫດການສົງຄາມກາງເມືອງ ເມື່ອ 6 ປີຜ່ານມາ ແລະ ຍັງດຳລົງຊີວິດໃນຄ້າຍພັກຊົ່ວຄາວຢູ່.

ແຜນການດັ່ງກ່າວນີ້ ແມ່ນຈະຮີບຮ້ອນໃຫ້ສຳເລັດ ພາຍໃນເວລາ 6 ເດືອນ ຊຶ່ງຈະຊ່ວຍໃຫ້ ບັນດາຜູ່ອົບພະຍົບ ທີ່ພັດພາກ ຈາກບ້ານເກີດເມືອງນອນ ພາຍໃນປະເທດ ເນື່ອງຈາກສົງຄາມ ເພື່ອກກັບຄືນສູ່ຖິ່ນຖານເດີມ ແລະ ເລີ່ມຕົ້ນຊີວິດໃໝ່ ພາຍຫລັງສົງຄາມໄດ້ສິ້ນສຸດລົງແລ້ວ.

ທັງນີ້ ເນື່ອງຈາກສີລັງກາ ປະເຊີນກັບພາວະສົງຄາມກາງເມືອງ ກັບກຸ່ມກະບົດ ນັບແຕ່ປີ 1972 – 2009 ຂ້າຊີວິດພົນລະເມືອງ ຫລາຍກ່ວາ 100,000 ຄົນ.