ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ວັນທີ 9 ທັນວານີ້, ບໍລິເວນຄວາມກົດດັນສູງ ຂອງອາກາດໜາວເຢັນທີ່ປະເທດຈີນ ຍັງສືບຕໍ່ປົກຄຸມຢູ່ທົ່ວທຸກພາກຂອງລາວ ດ້ວຍກຳລັງປານກາງ, ສົມທົບກັບກະແສລົມຕາເວັນອອກ-ຕາເວັນອອກສ່ຽງເໜືອ ພັດປົກຄຸມ, ຊຶ່ງລັກສະນະນີ້ ເຮັດໃຫ້ອຸນຫະພູມອາກາດເຢັນ ຢູ່ຕື່ມອີກໃນແຕ່ລະພາກ ແລະ ຈະມີຝົນຕົກກະຈາຍ ເປັນບາງໂອກາດ ຢູ່ບາງທ້ອງຖິ່ນ ແຂວງພາກເໜືອ ພ້ອມຈະມີລົມພັດແຮງ ເປັນບາງໂອກາດ.
ພາກເໜືອດ້ານຕາເວັນອອກ: ມີເມກປົກຄຸມເປັນສ່ວນຫລາຍ ອາກາດໜາວຕື່ມອີກ ແລະ ຍັງຈະມີຝົນຕົກກະຈາຍ ຢູ່ບາງທ້ອງຖິ່ນ ແຂວງຜົ້ງສາລີ ແລະ ຫົວພັນ ພ້ອມມີລົມພັດແຮງ ເປັນບາງໂອກາດ. ອຸນຫະພູມຕ່ຳສຸດ 9-11 ອົງສາ ແລະ ສູງສຸດ 15-17 ອົງສາ.
ພາກເໜືອດ້ານຕາເວັນຕົກ: ມີເມກປົກຄຸມເປັນສ່ວນຫລາຍ ອາກາດເຢັນ ຍັງສືບຕໍ່ ແລະ ຈະມີຝົນຕົກກະຈາຍ ຢູ່ບາງທ້ອງຖິ່ນ ພ້ອມມີລົມພັດແຮງ ເປັນບາງໂອກາດ. ອຸນຫະພູມຕ່ຳສຸດ 13-15 ອົງສາ ແລະ ສູງສຸດ 24-26 ອົງສາ. ສຳລັບເມືອງສິງ ແລະ ວຽງພູຄາ: ອາກາດຍັງໜາວ ແລະ ມີໝອກໜາໃນຕອນເຊົ້າ. ອຸນຫະພູມຕ່ຳສຸດ 12-14 ອົງສາ ແລະ ສູງສຸດ 23-25 ອົງສາ.
ນະຄອນຫລວງວຽງຈັນ: ມີເມກປົກຄຸມເປັນສ່ວນຫລາຍ, ອາກາດເຢັນ ພ້ອມມີໝອກບາງປົກຫຸ້ມຢູ່ທົ່ວໄປ ໃນຕອນເຊົ້າ ແລະ ມີລົມພັດແຮງ ເປັນບາງໂອກາດ. ອຸນຫະພູມຕ່ຳສຸດ 17-19 ອົງສາ ແລະ ສູງສຸດ 26-28 ອົງສາ.
ພາກກາງ: ມີເມກປົກຄຸມເປັນສ່ວນຫລາຍ, ອຸນຫະພູມອາກາດໜາວເຢັນ ພ້ອມມີໝອກບາງປົກຫຸ້ມຢູ່ທົ່ວໄປໃນຕອນເຊົ້າ. ອຸນຫະພູມຕ່ຳສຸດ 16-18 ອົງສາ ແລະ ສູງສຸດ 27-29 ອົງສາ. ສຳລັບແຂວງໄຊສົມບູນ: ອາກາດຍັງໜາວເຢັນ ພ້ອມມີໝອກໜາໃນຕອນເຊົ້າ. ອຸນຫະພູມ 11-13 ອົງສາ ແລະ ສູງສຸດ 20-22 ອົງສາ.
ພາກໃຕ້: ມີເມກປົກຄຸມເປັນບາງສ່ວນ, ອາກາດເຢັນ ພ້ອມມີໝອກບາງປົກຫຸ້ມຢູ່ທົ່ວໄປ ໃນຕອນເຊົ້າ. ອຸນຫະພູມຕ່ຳສຸດ 18-20 ອົງສາ ແລະ ສູງສຸດ 28-30 ອົງສາ. ສຳລັບເຂດປາກຊ່ອງ, ນິຄົມ 34: ອາກາດໜາວຫລາຍ ພ້ອມມີໝອກໜາປົກຫຸ້ມ ໃນຕອນເຊົ້າ. ອຸນຫະພູມຕ່ຳສຸດ 10-12 ອົງສາ ແລະ ສູງສຸດ 23-25 ອົງສາ.
ດັ່ງນັ້ນ ຈຶ່ງເຕືອນໃຫ້ປະຊາຊົນ ຜູ້ຢູ່ອາໃສໃນແຕ່ລະເຂດ ຈົ່ງເພີ່ມທະວີຮັກສາສຸຂະພາບຕົນເອງ ແລະ ເອົາໃຈໃສ່ປະຕິບັດ ຫລັກອະນາໄມ ໃຫ້ເປັນປົກກະຕິ, ໂດຍສະເພາະຕ້ອງນຸ່ງຫົ່ມໃຫ້ສະອາດ ແລະ ອົບອຸ່ນດີ ເພື່ອສາມາດຕ້ານທານ ກັບພະຍາດຕ່າງໆ ທີ່ອາດຈະເກີດຂຶ້ນໃນລະດູໜາວ.
ແຫລ່ງຂ່າວ:
