ຂປລ. ຊາວໜຸ່ມສາມຊາດ ລາວ-ຫວຽດນາມ-ກຳປູເຈຍ ໃນເຂດສາມລ່ຽມພັດທະນາ ຈະສືບຕໍ່ຮັດແໜ້ນການຮ່ວມມືພັດທະນາ ວຽກງານ ໃຫ້ມີຄວາມຍືນຍົງ ໂດຍຕິດພັນກັບການແກ້ໄຂຄວາມທຸກຍາກ ແລະ ປົກປັກຮັກສາ ສິ່ງແວດລ້ອມ ເພື່ອຍົກລະດັບຄຸນະພາບຊີວິດ ການເປັນຢູ່ຂອງປະຊາຊົນ ໃນເຂດສາມລ່ຽມພັດທະນາ ໃຫ້ໄດ້ຮັບການພັດທະນາດີຂຶ້ນ. ເຊິ່ງຈັດຂຶ້ນໃນວັນທີ 9-10 ທັນວາ ຢູ່ແຂວງຈຳປາສັກ.
ກອງ ປະຊຸມຈະໄດ້ປຶກສາຫາລືຮ່ວມກັນ ສາມຫົວຂໍ້ທີ່ສຳຄັນເຊັ່ນ: ຊາວໜຸ່ມ ລາວ-ຫວຽດນາມ-ກຳປູເຈຍ ກັບການປົກປັກຮັກສາ ແລະ ເສີມຂະຫຍາຍວັດທະນະທຳ, ການກະກຽມ ແຮງງານຊາວໜຸ່ມ ສູ່ປະຊາຄົມເສດຖະກິດອາຊຽນ ແລະ ຊາວໜຸ່ມລາວ-ຫວຽດນາມ-ກຳປູເຈຍ ກັບການສົ່ງເສີມການທ່ອງທ່ຽວແບບອານຸລັກ ຕິດພັນກັນການແກ້ໄຂຄວາມທຸກຍາກ ແລະ ຈະເປັນການເພີ່ມທະວີຄວາມເຂົ້າໃຈເຊິ່ງກັນ ແລະ ກັນ, ຈະເຮັດໃຫ້ຊາວໜຸ່ມ ເຂົ້າໃຈເຖິງ ມູນເຊື້ອສາມຊາດ ແລະ ຈະເປັນໂອກາດໃນການແລກປ່ຽນບັນ ດາຫົວຂໍ້ສຳຄັນຕ່າງໆ ໂດຍສະເພາະ ກ່ຽວກັບການພັດທະນາແບບຍືນຍົງ.
ທ່ານ ອາລຸນໄຊ ສຸນນະລາດ, ຫົວໜ້າຫ້ອງການສູນກາງຊາວໜຸ່ມ ປະຊາຊົນ ປະຕິວັດລາວ ໃຫ້ສຳພາດຕໍ່ສື່ມວນ ໃນວັນທີ 7 ທັນວາ ນີ້ວ່າ: ຊາວໜຸ່ມສາມຊາດຂອງພວກເຮົາ ຜູ້ທີ່ຈະກາຍເປັນຜູ້ນຳໃນອານາຄົດ ຈະໄດ້ພົບປະເພື່ອ ແລກປ່ຽນຄວາມຄິດຄວາມເຫັນ, ບັນດາບົດຮຽນທີ່ສຳຄັນ ແລະ ປະສົບການໃນຂົງເຂດວຽກງານຕ່າງໆ ເພື່ອເພີ່ມທະວີໃນການສ້າງ ຄວາມເຂັ້ມແຂງໃຫ້ຕົນເອງ ມີເງື່ອນໄຂເຂົ້າ ໃນການປະກອບສ່ວນ ພັດທະນາເສດຖະກິດ-ສັງຄົມແຫ່ງຊາດ ໃນສາມປະເທດ, ໂດຍສະເພາະໃນເຂດສາມລ່ຽມພັດນາ ເຊິ່ງຈະຫັນໃຫ້ເປັນ ເຂດພັດທະນາຕາມທິດຍືນຍົງ.
ທ່ານ ກ່າວຕື່ມວ່າ: ສະພາບການພັດທະນາປັດຈຸບັນນີ້ ໃນບາງປະເທດທີ່ກຳລັງພັດທະນາ ສ່ວນຫລາຍແມ່ນ ຈະເນັ້ນໃສ່ ແຕ່ເສດຖະກິດພຽງດ້ານດຽວ ໂດຍບໍ່ຕິດພັນກັນການປົກ ປັກຮັກສາວັດທະນະທຳ ແລະ ສັງຄົມ ເຮັດໃຫ້ການ ພັດທະນາ ບໍ່ໄປຕາມ ທິດຍືນຍົງ ເຊິ່ງເຮັດໃຫ້ເສຍງົບປະມານ ຈຳນວນຫລວງຫລາຍ ໃນການກັບມາປົກປັກຮັກສາຄືນໃໝ່. ສະນັ້ນ ເວທີນີ້ຈະໄດ້ ມີການແລກປ່ຽນ ເພື່ອຮັບປະກັນການ ພັດທະນາເສດຖະກິດ ທີ່ຕິດພັນກັບການ ຮັກສາ ວັດທະນະທຳ, ຮີດຄອງປະເພນີ ແລະ ສິ່ງແວດລ້ອມ.
ເຂດສາມລ່ຽມພັດທະນາ ລາວ -ຫວຽດນາມ – ກໍາປູເຈຍ ປະກອບດ້ວຍ 13 ແຂວງ, ສປປ ລາວມີ 4 ແຂວງ ຄື: ສາລະວັນ, ເຊກອງ, ຈຳປາສັກ ແລະ ອັດຕະປື, ກຳປູເຈຍມີ 4 ແຂວງ ແລະ ຫວຽດນາມມີ 5 ແຂວງ.
ແຫລ່ງຂ່າວ:
