ຂປລ. ຕອນບ່າຍຂອງວັນທີ 2 ທັນວາ 2015 ທີ່ທຳນຽບປະທານປະເທດ, ສະຫາຍ ບຸນຍັງ ວໍລະຈິດ ກຳ ມະການກົມການເມືອງສູນກາງພັກ ຜູ້ປະຈຳການຄະນະເລຂາທິການສູນກາງພັກ ຮອງປະທານປະເທດ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ແລະ ພົບປະກັບ ສະຫາຍ ຈາງ ເຕີ ຈຽງ ຄະນະປະຈຳກົມການເມືອງ ປະທານສະພາປະຊາຊົນຈີນ ພ້ອມດ້ວຍຄະນະ ໂອກາດເດີນທາງມາຢ້ຽມຢາມ ແລະ ຮ່ວມສະເຫລີມສະຫລອງວັນຊາດ 2 ທັນວາ ຄົບຮອບ 40 ປີ, ພ້ອມເຂົ້າຮ່ວມພິທີວາງສີລາເລີກ ໂຄງການກໍ່ສ້າງເສັ້ນທາງລົດໄຟ ລາວ–ຈີນ ອີກດ້ວຍ.
ໂອກາດນີ້ ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ແລະ ຕີລາຄາສູງ ຕໍ່ສະຫາຍ ຈາງ ເຕີ ຈຽງ ທີ່ໄດ້ເດີນທາງມາຢ້ຽມຢາມ ແລະ ຮ່ວມງານສະເຫລີມສະຫລອງໃຫຍ່ ວັນສະຖາປະນາ ສປປ ລາວ ຄົບຮອບ 40 ປີ ຕາມການເຊື້ອເຊີນຂອງ ພັກ ປປ ລາວ, ອັນເປັນການປະກອບສ່ວນສຳຄັນເຂົ້າ ໃນການສືບຕໍ່ເສີມສ້າງສາຍ ພົວພັນມິດຕະພາບ, ຄວາມສາມັກຄີພິເສດທີ່ເປັນມູນເຊື້ອ ແລະ ການຮ່ວມມືຍຸດທະສາດຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ–ຈີນ. ພ້ອມສະແດງຄວາມຂອບໃຈ ຕໍ່ພັກ–ລັດຖະບານ ແລະ ປະຊາຊົນຈີນ ໄດ້ໃຫ້ການສະໜັບສະໜູນຊ່ວຍເຫລືອໃນຫລາຍດ້ານໄລຍະຜ່ານມາ.
ສະຫາຍ ປະທານສະພາຜູ້ແທນປະຊາຊົນຈີນ ຈາງ ເຕີ ຈຽງ ກໍໄດ້ສະແດງຄວາມຂອບໃຈ ຕໍ່ສະຫາຍ ຮອງປະທານປະເທດ ທີ່ໃຫ້ການຕ້ອນຮັບອັນອົບ ແກ່ຄະນະຜູ້ແທນສະພາປະຊາຊົນຈີນ ໃນການຢ້ຽມຢາມລາວ ແລະ ເຂົ້າຮ່ວມງານສຳຄັນທາງປະຫວັດສາດຂອງຊາດລາວຄັ້ງນີ້ ພ້ອມສະແດງຄວາມເຊື່ອໝັ້ນວ່າ ການພົວພັນຮ່ວມມືທີ່ແໜ້ນແຟ້ນ ແລະ ຍຸດທະສາດຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ຈີນ–ລາວ ນັບມື້ຈະແຕກດອກອອກຜົນງອກງາມຍິ່ງໆຂຶ້ນ
ແຫລ່ງຂ່າວ:
