ໂດຍອີງຕາມແຜນການເຄື່ອນໄຫວເກັບກຳຂ່າວ ໃນຄວາມຄືບໜ້າຂອງໂຄງການລ້ຽງດູເດັກນ້ອຍ ແລະ ເດັກອ່ອນ (1.000 ວັນທຳອິດຂອງໄວເດັກ) ທີ່ເປັນໂຄງການຮ່ວມມືລະຫວ່າງກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ກັບອົງການຢູນີເຊັບ ໃນວັນທີ 17 ພະຈິກ 2015 ທ່ານ ບໍລິຖາ ໄຊປະສົງ ຫົວໜ້າຫ້ອງການສາທາລະນະສຸກເມືອງເລົ່າງາມ ແຂວງສາລະວັນ ໄດ້ກ່າວວ່າ: ກ່ຽວກັບການຈັດຕັ້ງປະຕິບັດໂຄງການດັ່ງກ່າວ ໃນໄລຍະຜ່ານມາແມ່ນໄດ້ຮັບຜົນດີ ເຊິ່ງມັນສະແດງໃຫ້ເຫັນເມືອງເລົ່າງາມມີຈຳນວນເດັກນ້ອຍທັງໝົດ 6.237 ຄົນ ເດັກທີ່ໄດ້ຮັບກັ່ນຕອງຊອກຫາເດັກຂາດສານອາຫານ ແລະ ເກືອແຮ່ ມີຈຳນວນ 5.364 ຄົນ ໃນນັ້ນ ພົບເຫັນເດັກນ້ອຍທີ່ຂາດສານອາຫານວິຕາມິນເກືອແຮ່ ຈຳນວນ 231 ຄົນ ເທົ່າກັບ 4% ຖືວ່າມີຈຳນວນໜ້ອຍ ທັງນີ້ກໍ່ຍ້ອນໂຄງການໄດ້ເຂົ້າເຖິງຊຸມຊົນເປັນຢ່າງດີ.
ໂຄງການດັ່ງກ່າວ ໄດ້ຈັດຕັ້ງປະຕິບັດຢູ່ເມືອງເລົ່າງາມເລີ່ມແຕ່ເດືອນຕຸລາ 2014 ເປັນຕົ້ນມາ ໂດຍໄດ້ເອົາພະນັກງານທີ່ໄດ້ຮັບການເຝິກອົບຮົມ ກ່ຽວກັບການໃຫ້ຄຳແນະນຳ ແລະ ປຸງແຕ່ງອາຫານປະສົມກັບຝຸ່ນວິຕາມິນເກືອແຮ່ ໃຫ້ເດັກນ້ອຍທີ່ຢູ່ໃນເກນເປົ້າໝາຍ ລົງໄປແນະນຳເຜີຍແຜ່ກ່ຽວກັບການຕົ້ມເຂົ້າປຽກ ໂດຍເອົາພືດຜັກທີ່ມີໃນທ້ອງຖິ່ນ ເປັນຕົ້ນ ໝາກກ້ວຍ ໝາກອຶ ແລະ ອື່ນໆ ມາປະສົມກັນແລ້ວປ້ອນໃຫ້ລູກກິນທຸກມື້ ທັງນີ້ ເພື່ອໃຫ້ຜູ້ປົກຄອງຂອງເດັກ ໄດ້ຮັບຮູ້ ມີຄວາມເຂົ້າໃຈ ແລະ ນຳໄປຈັດຕັ້ງປະຕິບັດໃຫ້ປາກົດຜົນເປັນຈິງ ພ້ອມນັ້ນ ກໍ່ໄດ້ແຈກຢາຍວິຕາມິນເກືອແຮ່ໃຫ້ເດັກນ້ອຍດັ່ງກ່າວ ເຊິ່ງປັດຈຸບັນ ເປົ້າໝາຍກັ່ນຕອງຊອກຫາເດັກຂາດສານອາຫານ ລວມທັງໝົດ 5.733 ຄົນ ໃນນີ້ ເດັກທີ່ໄດ້ຮັບການກັ່ນຕອງ ມີຈຳນວນ 4.973 ຄົນ ເທົ່າກັບ 86,74% ແລະ ເດັກຢູ່ໃນເປົ້າໝາຍທີ່ມີອາຍຸລະຫວ່າງ 6-23 ເດືອນ ທີ່ຈະໄດ້ຮັບຝຸ່ນວິຕາມິນມີຈຳນວນ 2.007 ຄົນ ໄດ້ຮັບຝຸນວິຕາມິນເກືອແຮ່ໄປແລ້ວຈຳນວນ 1.430 ຄົນ ເທົ່າກັບ 72,24% ເດັກທີ່ຂາດສານອາຫານແມ່ນບໍ່ມີໂອກາດດັ່ງກ່າວ ຄະນະສື່ມວນຊົນ ກໍ່ໄດ້ໄປຕິດຕາມເບິ່ງຜົນໄດ້ຮັບຂອງໂຄງການດັ່ງກ່າວຢູ່ບ້ານນາທັນ ແລະ ບ້ານດົງຕ້ອງນ້ອຍ ທີ່ເປັນບ້ານກຳລັງຈັດຕັ້ງປະຕິບັດໂຄງການ 1.000 ວັນທຳອິດຂອງເດັກຂອງເມືອງດັ່ງກ່າວຕື່ມອີກ.
ແຫ່ລງຂ່າວ
