ກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 11 ສະໄໝທີ IX ໂດຍເປັນປະທານຂອງສະຫາຍ ຈູມມາລີ ໄຊຍະສອນ ເລຂາທິການໃຫຍ່ ຄະນະບໍລິຫານງານສູນກາງພັກ ປະທານປະເທດ ຢູ່ຫ້ອງວ່າການສູນກາງພັກ ດຳເນີນມາເປັນເວລາ 5 ວັນເຄິ່ງ ຮອດຕອນເຊົ້າວັນທີ 16 ພະຈິກ 2015 ໄດ້ປິດລົງດ້ວຍຜົນສຳເລັດອັນຈົບງາມ.
ກອງປະຊຸມໄດ້ພ້ອມກັນສະຫຼຸບຕີລາຄາຄືນ ກ່ຽວກັບຜົນການກະກຽມ ແລະ ດຳເນີນກອງປະຊຸມໃຫຍ່ຂອງບັນດາອົງຄະນະພັກກະຊວງ ອົງການແຂວງ ແລະ ນະຄອນຫຼວງວຽງຈັນ ທີ່ໄດ້ສຳເລັດໄປແລ້ວ ສະຫຼຸບຕີລາຄາໝາກຜົນຂອງການເຮັດທົດລອງວຽກງານ 3 ສ້າງ ໃນໄລຍະເກືອບ 3 ປີຜ່ານມາ ແລະ ໃຫ້ທິດຊີ້ນຳໃນການສືບຕໍ່ຜັນຂະຫຍາຍວຽກງານ 3 ສ້າງໃນຊຸມປີຕໍ່ໜ້າ ສະຫຼຸບຜົນການຈັດຕັ້ງປະຕິບັດຂະບວນການແຂ່ງຂັນຮັກຊາດ ແລະ ພັດທະນາ ໂດຍສະເພາະແມ່ນ ຂະບວນການແຂ່ງຂັນສ້າງບ້ານພັດທະນາຕາມທິດ 3 ສ້າງ ຄົ້ນຄວ້າ ປະກອບຄຳເຫັນໃສ່ບັນດາເອກະສານ ທີ່ເປັນເນື້ອໃນຕົ້ນຕໍຂອງ ກອງປະຊຸມໃຫຍ່ຄັ້ງທີ X ຂອງພັກ ເຊິ່ງຄາດວ່າຈະດຳເນີນໃນທ້າຍເດືອນມັງກອນ 2016 ນອກນີ້ ກອງປະຊຸມຍັງໄດ້ຟັງລາຍງານຜົນການເຄື່ອນໄຫວຊີ້ນຳ-ນຳພາຂອງ ກົມການເມືອງ ແລະ ຄະນະເລຂາທິການສູນກາງພັກ ໃນໄລຍະ 6 ເດືອນຜ່ານມາ ແລະ ວຽກງານຈຸດສຸມ ແຕ່ນີ້ເຖິງກອງປະຊຸມໃຫຍ່ ຄັ້ງທີ X ຂອງພັກ.
ກ່ຽວກັບຜົນການຈັດຕັ້ງປະຕິບັດການເຮັດທົດລອງ 3 ສ້າງ ໂດຍສະເພາະແມ່ນສ້າງບ້ານພັດທະນາຢູ່ 109 ບ້ານເປົ້າໝາຍນັ້ນ ໂດຍທົ່ວໄປແມ່ນໄດ້ປະຕິບັດຖືກທິດທາງທີ່ໄດ້ກຳນົດໄວ້ ທີ່ປະຊຸມໄດ້ມອບຄວາມຮັບຜິດຊອບໃຫ້ຄະນະພັກຢູ່ບັນດາກະຊວງ ອົງການ ແຂວງ ນະຄອນຫຼວງວຽງຈັນ ສືບຕໍ່ຊີ້ນຳ-ນຳພາ ເຮັດວຽກງານ 3 ສ້າງ ດ້ວຍການຈັດຕັ້ງຄົ້ນຄວ້າ ເຊື່ອມຊຶມມະຕິ 3 ສ້າງ ໃຫ້ມີການຈັດຕັ້ງຜັນຂະຫຍາຍແບ່ງງານ ແບ່ງຄວາມຮັບຜິດຊອບ ແລະ ຊີ້ນຳບັນຊາຢ່າງເປັນລະບົບ ມີຈຸດສຸມ ມີການກວດກາ ດັດປັບ ປະເມີນຜົນຢ່າງເປັນປົກກະຕິ ເພື່ອບັນລຸຄາດໝາຍທີ່ວາງໄວ້.
ພ້ອມນີ້ ທີ່ປະຊຸມຍັງເປັນເອກະພາບກັນກ່ຽວກັບຜົນການຈັດຕັ້ງປະຕິບັດວຽກງານ ແຂ່ງຂັນ ຮັກຊາດ ແລະ ພັດທະນາພິເສດ ທີ່ປະຊຸມໄດ້ໃຫ້ທິດຊີ້ນຳຕໍ່ການປັບປຸງເອກະສານ ທີ່ຈະສະເໜີຜ່ານກອງປະຊຸມໃຫຍ່ ຄັ້ງທີ X ຂອງພັກພິຈາລະນາຮັບຮອງເອົາ ເຊິ່ງໂດຍລວມແລ້ວກອງປະຊຸມໄດ້ໃຫ້ທັດສະນະວ່າ ການປັບປຸງຮ່າງລາຍງານການເມືອງ ຮ່າງພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII (2016-2020) ຮ່າງຍຸດທະສາດການພັດທະນາເສດຖະກິດ-ສັງຄົມແຫ່ງຊາດ ໄລຍະ 10 ປີ (2015-2025) ແລະ ວິໄສທັດ ຮອດປີ 2020 ຮ່າງກົດລະບຽບຂອງພັກ ແລະ ບັນຫາດ້ານບຸກຄະລາກອນໃຫ້ແກ່ສະໄໝທີ X ສົມບູນກວ່າເກົ່າ.
ແຫລ່ງຂ່າວ:
