ແມ່ເຖົ້າຊາວອອດສ໌ເຕເລຍ ແຄ້ນໃຈທີ່ລູກຫລານບໍ່ເບິ່ງແຍງແລະສົ່ງນາງໄປຢູ່ເຮືອນພັກຄົນ ຊະລາ ຕັດສິນໃຈຈີກເງິນມູນຄ່າລວມເກືອບ 1 ລ້ານຍູໂຣຂອງນາງຖິ້ມ ກ່ອນຈະສິ້ນລົມເພື່ອເອົາຄືນບັນດາລູກຫລານ
ສຳນັກຂ່າວຕ່າງ ປະເທດລາຍງານເມື່ອມື້ວັນພະຫັດທີ່ 5 ພະຈິກ ໂດຍອ້າງການເປີດເຜີຍຈາກແຫລ່ງຂ່າວໃນຫນ່ວຍງານຍຸດຕິທຳຂອງອອດສ໌ເຕເລຍ ວ່າ ແມ່ເຖົ້າຊາວອອດສ໌ເຕເລຍໄວ 85 ປີ ໄດ້ຕັດເງິນຖິ້ມຈຳນວນເກືອບລ້ານຍູໂຣກ່ອນຕາຍ ພຽງເພື່ອຕ້ອງການສ້າງຄວາມເຈັບໃຈໃຫ້ກັບບັນດາລູກຫລານທີ່ບໍ່ ເບິ່ງແຍງນາງ ເງິນທີ່ຖືກຕັດ ເປັນເງີນຍູໂຣໃບລະ 100 ຍູໂຣ ແລະ 500 ຍູໂຣ ລວມມີຈຳນວນເຖິງ 950,000 ຍູໂຣ ຖືກພົບເທິງຕຽງນອນໃນຫ້ອງຂອງແມ່ເຖົ້າລາຍນີ້ທີ່ເຮືອນພັກຄົນ ຊະລາແຫ່ງໜຶ່ງ ຊຶ່ງນາງຫາກໍ່ຖືກຍ້າຍມາຢູ່ໄດ້ພຽງ 5 ມື້ກ່ອນທີ່ນາງຈະເສຍຊີວິດ
ເອລິດ ຮາບິດຊ໌ ໄອຍະການແຫ່ງເມືອງ Wiener Neustadt ໄດ້ຢືນຢັນກັບຫນັງສືພິມຄູເຣຍ (Kurier) ວ່າ ຍິງຊະລາໄດ້ທຳລາຍບັນຊີເງີນຝາກທະນາຄານຂອງນາງ ໂດຍເຈົ້າຫນ້າທີ່ໄອຍະການໄດ້ຮັບແຈ້ງແຕ່ບໍ່ໄດ້ດຳເນີນຄະດີໃດໆໄດ້ ເນື່ອງຈາກກໍລະນີນີ້ບໍ່ຖືວ່າເປັນຄະດີອາຍາ ເພາະເງິນທີ່ຖືກຈີກເປັນຊັບສິນສ່ວນຕົວຂອງຍິງຊະລາຄົນດັ່ງກ່າວ
ຢ່າງໃດ ກໍຕາມ ການແກ້ແຄ້ນຂອງແມ່ເຖົ້າຄົນນີ້ເບິ່ງຄືວ່າຈະບໍ່ເຮັດໃຫ້ບັນດາ ລູກຫລານທຸກຮ້ອນໃຈເທົ່າທີ່ນາງ ຫວັງ ເມື່ອທະນາຄານແຫ່ງຊາດອອດສ໌ເຕເລຍຢືນຢັນກັບຫນັງສືພິມຄູເຣຍວ່າ ພ້ອມທີ່ຈະແລກປ່ຽນເງິນໃໝ່ຕາມຈຳນວນຂອງເງິນທີ່ຖືກທຳລາຍ ຫາກມີການຮັບປະກັນຈຳນວນເງີນແລະພົບເສດເງິນທີ່ຖືກຈີກທັງໝົດ