NASA ເຜີຍພາບຖ່າຍດາວຫາງ 2015 TB145 ເຄື່ອນຜ່ານໂລກໃນມື້ຮາໂລວີນ ຮູບຮ່າງຄ້າຍກັບກະໂຫລກມະນຸດ
ອົງການບໍລິຫານການບິນແລະອາວະກາດແຫ່ງຊາດສະຫະລັດ ຫລື NASA ເຜີຍພາບຖ່າຍດາວຫາງ 2015 TB145 ທີ່ຫາກໍ່ຈະເຄື່ອນຜ່ານໂລກໃນໄລຍະມື້ຮາໂລວີນທີ່ຜ່ານມາ ເປັນຄວາມບັງເອີນທີ່ດາວຫາງດວງນີ້ມີຮູບຮ່າງຄ້າຍກັບກະໂຫລກຂອງມະນຸດ ເຄື່ອນຜ່ານໂລກເພື່ອສະຫລອງຮາໂລວີນໄປພ້ອມກັບຄົນເທິງໂລກ
ພາບ ດາວຫາງ 2015 TB145 ນີ້ ບັນທຶກໄດ້ຈາກກ້ອງໂທລະທັດອິນຟາເລດເທິງເກາະຮາວາຍ ເມື່ອວັນທີ່ 30 ຕຸລາທີ່ຜ່ານມາ ສະແດງໃຫ້ເຫັນຮູບຮ່າງຂອງມັນທີ່ຄ້າຍກັບກະໂຫລກມະນຸດຢ່າງຫລາຍ ກ່ອນທີ່ດາວຫາງດວງນີ້ຈະເຄື່ອນຜ່ານໂລກໄປໃນໄລຍະຫ່າງປະມານ 486,000 ກິໂລແມັດ ຊຶ່ງຖືວ່າໂຄຈອນເຂົ້າມາໃນໄລຍະໃກ້ ເມື່ອເວລາປະມານ 13.00 ນ. (ຕາມມາດຕະຖານເຂດເວລາຕະເວັນອອກ) ຂອງວັນທີ່ 31 ຕຸລາ ຫລືກໍຄືມື້ຮາໂລວີນນັ້ນເອງ
ດາວຫາງ 2015 TB145 ມີຂະໜາດເສັ້ນຜ່ານສູນກາງປະມານ 600 ແມັດ ໝຸນຮອບຕົວເອງ 1 ຮອບໃຊ້ເວລາປະມານ 5 ຊົ່ວໂມງ ຫາກໍ່ຈະຖືກຄົ້ນພົບເມື່ອວັນທີ່ 10 ຕຸລາທີ່ຜ່ານມາ ໂດຍກ້ອງໂທລະທັດ Pan-STARRS-1 ຂອງມະຫາວິທະຍາໄລຮາວາຍ
ລາຍງານລະບຸວ່າ ດາວຫາງ 2015 TB145 ຈະໂຄຈອນເຂົ້າໃກ້ໂລກອີກເທື່ອໃນເດືອນກັນຍາ 2018 ແຕ່ລໄລຍະຈະໄກກວ່ານີ້ຫລາຍ ຄືປະມານ 38 ລ້ານກິໂລແມັດ ຫລືປະມານ 1 ໃນ 4 ຂອງໄລຍະຫ່າງລະຫວ່າງໂລກກັບດວງອາທິດ