ສຳນັກຂ່າວຕ່າງປະເທດ ລາຍງານໃນວັນທີ 13 ຕຸລາຜ່ານມານີ້ວ່າ ຈາກເຫດການໄຟປ່າໄໝ້ລາມຢູ່ເກາະສຸມາດຕຣາ ປະເທດອິນໂດເນເຊຍ ໄດ້ສົ່ງຜົນເຮັດໃຫ້ຄວັນໄຟແຜ່ປົກຄຸມປະເທດສິງກະໂປ ຊຶ່ງຫລ້າສຸດສາມາດວັດແທກຄ່າດັດຊະນີມາດຕະຖານມົນລະພິດ ຫລື PSI ໃນຮອບ 24 ຊົ່ວໂມງຜ່ານມາ ແມ່ນຢູ່ໃນລະດັບ 114-136 ແລະ ບາງໄລຍະສາມາດແທກໄດ້ເຖິງ 145 ຊຶ່ງຖືວ່າເປັນລະດັບທີ່ອັນຕະລາຍຕໍ່ສຸຂະພາບ.
ທັງນີ້ ກອງກຳລັງຈາກຫລາຍປະເທດ ກຳລັງລະດົມພົນເຂົ້າຊ່ວຍເຫລືອອິນໂດເນເຊຍ ໃນການດັບໄຟປ່າທີ່ເກາະສຸມາດຕຣາຢ່າງເຕັມທີ່ ຊຶ່ງທາງການຂອງອິນໂດເນເຊຍໄດ້ອອກມາລະບຸວ່າ ອາດໃຊ້ເວລາບໍ່ຕ່ຳກ່ວາ 10 ມື້ ຈຶ່ງຈະສາມາດມອດໄຟທັງໝົດໄວ້ໄດ້.