ສຳນັກຂ່າວຕ່າງປະເທດ ລາຍງານໃນວັນທີ 13 ຕຸລານີ້ວ່າ ພັນເອກ ສະຕີບ ວໍເຣັນ ໂຄສົກກອງກຳລັງພັນທະມິດ ຊຶ່ງນຳໂດຍສະຫະລັດອາເມຣິກາ ປະຈຳຖານທັບທີ່ນະຄອນຫລວງແບກແດດ ປະເທດອີຣັກ ໄດ້ອອກມາເປີດເຜີຍວ່າ ເຮືອບິນລຳລຽງຂອງກອງທັບສະຫະລັດຯ ໄດ້ສົ່ງລູກປືນ ແລະ ລະເບີດມື ລວມກ່ວາ 50 ໂຕນ ໃຫ້ແກ່ກຸ່ມຕິດອາວຸດ ພັນທະມິດອາຫລັບຊີຣີ (Syrian Arab Coalition: SAC) ໃນວັນທີ 11 ຕຸລາຜ່ານມາ ເພື່ອສະໜັບສະໜູນດ້ານອາວຸດຍຸດໂທປະກອນໃຫ້ແກ່ກຸ່ມດັ່ງກ່າວ ຊຶ່ງກຳລັງຕໍ່ສູ້ກັບກຸ່ມໄອເອັສ ຢູ່ບໍລິເວນເມືອງຣັກກະ ທາງພາກເໜືອຂອງປະເທດຊີຣີ.

ທັງນີ້ ການສົ່ງອາວຸດໃຫ້ແກ່ກຸ່ມຕິດອາວຸດໃນຊີຣີ ແມ່ນເກີດຂຶ້ນພາຍຫລັງຣັດເຊຍໄດ້ປະຕິບັດການໂຈມຕີທາງອາກາດຕໍ່ກຸ່ມໄອເອັສໃນຊີຣີ ໂດຍ ພັນເອກ ສະຕີບ ວໍເຣັນ ໄດ້ຮັບປະກັນວ່າ ມີຄວາມສ່ຽງພຽງເລັກໜ້ອຍທີ່ກຸ່ມ SAC ຈະຖືກໂຈມຕີດ້ວຍລະເບີດຂອງຣັດເຊຍ ເນື່ອງຈາກກອງທັບຣັດເຊຍມຸ່ງເນັ້ນການໂຈມຕີໃນພື້ນທີ່ອື່ນ.