ສຳນັກຂ່າວຕ່າງປະເທດລາຍງານວ່າ ໃນວັນອາທິດທີ 27 ກັນຍາຜ່ານມານີ້ ເກີດເຫດເຮືອຜູ້ອົບພະຍົບທີ່ກຳລັງມຸ່ງໜ້າໄປປະເທດເກຣັກ ຫລົ້ມຢູ່ບໍລິເວນນອກຊາຍຝັ່ງປະເທດຕວກກີອີກ ເຮັດໃຫ້ມີຜູ້ເສຍຊີວິດທັງໝົດ 17 ຄົນ ໃນນັ້ນມີແມ່ຍິງ 5 ຄົນ ແລະ ເດັກນ້ອຍອີກ 5 ຄົນ ຊຶ່ງທັງໝົດເປັນຊາວຊີຣີ ໃນຂະນະທີ່ເຈົ້າໜ້າທີ່ກູ້ໄພສາມາດຊ່ວຍເຫລືອຜູ້ລອດຊີວິດໄວ້ໄດ້ 20 ຄົນ.
ທັງນີ້ ວິກິດການຜູ້ອົບພະຍົບທີ່ເດີນທາງຈາກຕາເວັນອອກກາງ ຜ່ານທະເລເມດິແຕຣານຽນ ໂດຍມີຈຸດປະສົງເຂົ້າໄປອາໄສຢູ່ສະຫະພາບເອີຣົບໃນປັດຈຸບັນ ກຳລັງເປັນບັນຫາຊຶ່ງຜູ້ນຳເອີຣົບກຳລັງໂຕ້ຖຽງກັນເພື່ອຊອກຫາທາງອອກ.