ບໍລິສັດ ມີລີຄອມລາວ (ທິໂກ້) ໃນເມື່ອກ່ອນ ກໍຄືບໍລິສັດ ວິມເປວຄອມລາວ ຈຳກັດ (ບີລາຍ) ໃນປັດຈຸບັນ ໄດ້ໃຫ້ການສະໜັບສະໜູນທຶນການສຶກສາແກ່ ສປປ ລາວ ນັບແຕ່ປີ 2009 ເປັນຕົ້ນມາ ຊຶ່ງໃນໄລຍະຜ່ານມາ ນອກຈາກໃຫ້ທຶນປຸກສ້າງອາຄານຮຽນແລ້ວ ຍັງໃຫ້ທຶນສົ່ງເສີມນັກຮຽນທີ່ຮຽນດີຮຽນເກັ່ງ ມີຄຸນສົມບັດດີ ແຕ່ຖານະຄອບຄົວທຸກຍາກ ໃຫ້ໄດ້ຮຽນຕໍ່ໃນລະດັບວິຊາຊີບຊັ້ນສູງ ແລະ ປະລິນຍາຕີ ຊຶ່ງໂຄງການດັ່ງກ່າວນີ້ ເປັນໂຄງການໜຶ່ງທີ່ທາງບີລາຍມີເຈດຈຳນົງ ຢາກມີສ່ວນຮ່ວມໃນການພັດທະນາການສຶກສາ ກໍຄືການສ້າງຊັບພະຍາກອນມະນຸດຂອງຊາດຢູ່ ສປປ ລາວ.
ໂຄງການໃຫ້ທຶນການສຶກສານີ້ ບີລາຍໄດ້ເລີ່ມມາແຕ່ປີ 2009 ເປັນຕົ້ນມາ ແລະ ມາຮອດປັດຈຸບັນແມ່ນເປັນຮຸ່ນທີ 4 ແລ້ວ ທຶນການສຶກສາດັ່ງກ່າວ ແມ່ນຈະກວມເອົາຄ່າລົງທະບຽນຮຽນ ຄ່າຕຳລາຮຽນທີ່ຕ້ອງໃຊ້ ຄ່າຫໍພັກ ເບ້ຍລ້ຽງປະຈຳເດືອນ ມູນຄ່າໂທ ເຄື່ອງແບບນັກສຶກສາ ແລະ ອຸປະກອນການຮຽນທີ່ຈຳເປັນ ຈົນຈົບຫຼັກສູດການຮຽນແຕ່ລະຂະແໜງການ ແລະ ວິຊາຮຽນ ຊຶ່ງໂຄງການນີ້ນັບແຕ່ປີ 2009 ມາຮອດປີ 2013 ມີນັກຮຽນໄດ້ຮັບທຶນການສຶກສາທັງໝົດ ຈຳນວນ 32 ຄົນ ລວມຄ່າໃຊ້ຈ່າຍທັງໝົດ 180.000 ໂດລາສະຫະລັດ ຫຼື ປະມານ 1,44 ຕື້ກີບ ໃນນັ້ນ ປີ 2009 ມີ 6 ຄົນ ປີ 2010 ມີ 8 ຄົນ ປີ 2011 ມີ 8 ຄົນ ແລະ ປີ 2012 ປີ 2013 ມີ 10 ຄົນ ໃນຈຳນວນນັກສຶກສາທັງໝົດແມ່ນມີ 2 ຄົນ ໄດ້ສຳເລັດການສຶກສາໄປແລ້ວ ແລະ ໃນຈຳນວນນັກຮຽນ 10 ຄົນທີ່ໄດ້ຮັບທຶນການສຶກສາປີ 2013 ນີ້ ຈາກນະຄອນຫຼວງວຽງຈັນ 1 ຄົນ ແຂວງບໍລິຄຳໄຊ 1 ຄົນ ແຂວງຊຽງຂວາງ 3 ຄົນ ແຂວງຫຼວງພະບາງ 1 ຄົນ ແຂວງຫົວພັນ 1 ຄົນ ແຂວງໄຊຍະບູລີ 1 ຄົນ ແຂວງເຊກອງ 1 ຄົນ ແລະ ແຂວງອັດຕະປື 1 ຄົນ.
ພິທີມອບ-ຮັບທຶນການສຶກສາ ປະຈຳປີ 2013 ໄດ້ຈັດຂຶ້ນວັນທີ 6 ພະຈິກ 2013 ຜ່ານມາທີ່ນະຄອນຫຼວງວຽງຈັນ ກ່າວມອບໂດຍແມ່ນທ່ານ ຄຳກ້າ ຫາດາວເຮືອງ ຜູ້ຊ່ວຍຝ່າຍບໍລິຫານ ຫົວໜ້າຝ່າຍພົວພັນລັດຖະບານຂອງບໍລິສັດ ວິມເປວຄອມລາວ ຊຶ່ງມີບັນດາພະນັກງານພາຍໃນບໍລິສັດດັ່ງກ່າວເຂົ້າຮ່ວມ.