ສຳນັກຂ່າວຕ່າງປະເທດ ລາຍງານໃນວັນທີ 13 ສິງຫານີ້ວ່າ ໄດ້ເກີດເຫດລະເບີດຮຸນແຮງໃນເຂດອຸດສາຫະກຳ ຢູ່ເມືອງທຽນຈິນ ຫ່າງຈາກນະຄອນຫລວງປັກກິ່ງ ໄປທາງຕາເວັນອອກສຽງໃຕ້ປະມານ 140 ກິໂລແມັດ ເມື່ອເວລາຕອນຄ່ຳ ເວລາ 23:30 ໂມງ ຕາມເວລາທ້ອງຖິ່ນ ຂອງມື້ວັນພຸດທີ 12 ສິງຫາຜ່ານມານີ້ ໂດຍລະເບີດໄດ້ເກີດຂຶ້ນຢູ່ສາງເກັບສິນຄ້າອັນຕະລາຍ ຊຶ່ງຄາດວ່າອາດແມ່ນວັດຖຸໄວໄຟ ເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 7 ຄົນ ແລະ ມີຜູ້ໄດ້ຮັບບາດເຈັບອີກຫລາຍຮ້ອຍຄົນ, ແຮງລະເບີດໄດ້ເຮັດໃຫ້ເກີດເປັນແປວໄຟລູກໃຫຍ່ຂຶ້ນເທິງທ້ອງຟ້າ ແລະ ເຮັດໃຫ້ແວ່ນປ່ອງຢ້ຽມ ແລະ ສິ່ງກໍ່ສ້າງຢູ່ໃກ້ຄຽງໄດ້ຮັບຄວາມເສຍຫາຍຢ່າງກວ້າງຂວາງ.