ສຳນັກຂ່າວຕ່າງປະເທດ ລາຍງານໃນວັນທີ 26 ກໍລະກົດຜ່ານມານີ້ວ່າ ການບິນໄທ ເຊິ່ງເປັນສາຍການບິນແຫ່ງຊາດຂອງໄທ ປະກາດປົດພະນັກງານລວດດຽວ 1,401 ຕຳແໜ່ງ ເຊິ່ງເປັນໜຶ່ງໃນມາດຕະການທີ່ໃຊ້ເພື່ອຕັດຫລຸດຕົ້ນທຶນ ແລະ ຄ່າໃຊ້ຈ່າຍພາຍໃນອົງກອນ ໃຫ້ລົງ 20% ພາຍໃນກຳນົດໄລຍະ 2 ປີ ເຊິ່ງຈະມີຜົນນັບຕັ້ງແຕ່ວັນທີ 25 ຕຸລາ 2015 ນີ້ ໂດຍນອກຈາກຈະມີການປົດພະນັກງານແລ້ວ ການບິນໄທ ຍັງມີແຜນຂາຍເຮືອບິນໃນຝູງບິນຂອງຕົນອອກອີກດ້ວຍ ເພື່ອຫລຸດຄ່າໃຊ້ຈ່າຍໃນການບຳລຸງຮັກສາ ແລະ ແບກຮັບຕົ້ນທຶນເຊື້ອໄຟທີ່ສູງ.
ນອກນັ້ນ, ການບິນໄທ ຍັງຈະຍົກເລີກການໃຫ້ບໍລິການຖ້ຽວບິນລະຫວ່າງປະເທດອີກຫລາຍເສັ້ນທາງ ເນື່ອງຈາກປະສົບກັບສະພາວະຂາດທຶນໃນເສັ້ນທາງດັ່ງກ່າວ ເຊິ່ງລວມມີເສັ້ນທາງບິນໄປນະຄອນລອດແອງເຈີລິສຂອງສະຫະລັດອາເມຣິກາ ແລະ ເສັ້ນທາງສູ່ນະຄອນຫລວງໂຣມ ປະເທດອີຕາລີ ທີ່ມີຕົ້ນທຶນໃນການໃຫ້ບໍລິການສູງເຖິງລະ 100 ລ້ານບາດ.