ສຳນັກຂ່າວຕ່າງປະເທດ ລາຍງານໃນວັນທີ 21 ກໍລະກົດນີ້ ໂດຍອ້າງແຫລ່ງຂ່າວຈາກສຳນັກຂ່າວຊິນຫົວຂອງຈີນ ໄດ້ລາຍງານວ່າ ທ່ານ ຫລິງ ຈື້ຫົວ ເຊິ່ງເຄີຍເປັນທີ່ປຶກສາໃກ້ຊິດຂອງ ອະດີດປະທານປະເທດ ຫູ ຈິ່ນເທົາ ຂອງຈີນ ໄດ້ຖືກດຳເນີນຄະດີຂໍ້ຫາສໍ້ລາດບັງຫລວງ ຮັບເງິນສິນບົນ ພ້ອມທັງພົວພັນຊູ້ສາວກັບຍິງອື່ນ ໂດຍທ່ານ ຫລິງ ຈື້ຫົວ ໄດ້ຖືກລຶບຊື່ອອກຈາກການເປັນສະມາຊິກພັກກອມມູນິດຈີນມາແລ້ວ ຫລັງຈາກທີ່ມີການປະກາດຄວາມຜິດ ຕໍ່ສາທາລະນະ ເມື່ອເດື່ອທັນວາປີ 2014 ທີ່ຜ່ານມາ.
ທ່ານ ຫລິງ ຈື້ຫົວ ໄດ້ພົບກັບວິບາກກຳຕາມທັນ ຈາກເຫດການລູກຊາຍຂອງທ່ານ ຂັບລົດເຟີຣາຣີ່ ລຸ້ນ 458 Spider Car ດ້ວຍຄວາມໄວສູງ ແລ້ວປະສົບອຸບັດເຫດ ເສຍຊີວິດເມື່ອປີ 2012 ຈົນກາຍເປັນປະເດັນເຮັດໃຫ້ສັງຄົມຈີນຕັ້ງຄຳຖາມວ່າ ລູກຊາຍຂອງທ່ານ ຫລິງ ຈື້ຫົວ ເອົາເງິນຈາກໃສມາຊື້ລົດຫລູລາຄາແພງຂະໜາດນີ້ ເຮັດໃຫ້ນຳໄປສູ່ການສອບສວນທີ່ໄປທີ່ມາຂອງການຮັ່ງມີຜິດປົກກະຕິດັ່ງກ່າວ.
ທັງນີ້ ນັບຕັ້ງແຕ່ປະທານປະເທດ ສີ ຈິ້່ນຜິງ ຂຶ້ນດຳລົງຕຳແໜ່ງເປັນຜູ້ນຳສູງສຸດຂອງພັກ ແລະ ລັດຖະບານຈີນ ຕໍ່ຈາກປະທານປະເທດ ຫູ ຈິ່ນເທົາ ໃນປີ 2013 ແມ່ນໄດ້ດຳເນີນນະໂຍບາຍປາບປາມການສໍ້ລາດບັງຫລວງ ໂດຍສະເພາະແມ່ນເຈົ້າໜ້າທີ່ລະດັບສູງມາແລ້ວຫລາຍຄົນ ໃນນັ້ນລວມມີທັງທ່ານ ໂຈວ ຢົ່ງຄັງ ເຊິ່ງມີຕຳແໜ່ງສູງເຖິງອະດີດກຳມະການກົມການເມືອງສູນກາງພັກ ກໍໄດ້ຖືກສານຕັດສິນຕັດສິດສະຫລະພາບຕະຫລອດຊີວິດມາແລ້ວ.