ກົມອຸຕຸນິຍົມ ແລະ ອຸທົກກະສາດ ໃຫ້ຮູ້ວ່າ: ຮ່ອງຄວາມກົດດັນອາກາດຕ່ຳ ຍັງສືບຕໍ່ພັດຜ່ານເຂດພາກເໜືອ ແລະ ພາກກາງຂອງລາວ, ສົມທົບກັບລົມມໍລະສຸມຕາເວັນຕົກສ່ຽງໃຕ້ມີກຳລັງປານກາງພັດປົກຄຸມ, ເຊິ່ງເຮັດໃຫ້ມີຝົນຕົກຟ້າຄະນອງໃນລະດັບຄ່ອຍເປັນບໍລິເວນກວ້າງ ແລະ ຕົກປານກາງຫາຕົກໜັກຢູ່ບາງທ້ອງຖິ່ນຂອງແຂວງພາກກາງ ແລະ ຍັງຈະເຮັດໃຫ້ລະດັບນໍ້າເຊບັ້ງໄຟຂຶ້ນສູງເຖິງ 15,91 ແມັດ ໃນຕອນເຊົ້າຂອງວັນທີ 20 ກໍລະກົດຜ່ານມາ ແລະ ຄາດຄະເນວ່າສະພາບຝົນຈະສືບຕໍ່ຕົກໄປອີກ 1-2 ວັນ, ພ້ອມທັງເຮັດໃຫ້ລະດັບນ້ຳສູງຂຶ້ນ ກາຍເຂດລະວັງໄພ (17,50 ແມັດ). ດັ່ງນັ້ນຈຶ່ງຂໍແຈ້ງເຕືອນເຖິງອຳນາດການປົກຄອງທຸກພາກສ່ວນ ແລະ ປະຊາຊົນທີ່ອາໃສຢູ່ລຽບຕາມແຄມລຳນ້ຳເຊບັ້ງໄຟ ຈົ່ງມີສະຕິລະມັດລະວັງຕໍ່ສະພາບຝົນຕົກໜັກ, ນ້ຳຖ້ວມ ແລະ ໃຫ້ເກັບມ້ຽນມັດວັດຖຸສິ່ງຂອງໄປໄວ້ບ່ອນທີ່ປອດໄພ ແລະ ໃຫ້ຕິດຕາມການລາຍງານຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດເປັນປະຈຳ.
ສຳລັບເຂດພາກເໜືອດດ້ານຕາເວັນອອກ: ມີເມກປົກຄຸມເປັນບາງສ່ວນ, ຈະມີຝົນຕົກຟ້າຄະນອງກະຈາຍໃນລະດັບຄ່ອຍຢູ່ເກືອບທົ່ວໄປ ແລະ ພາກເໜືອດ້ານຕາເວັນຕົກ: ມີເມກປົກຄຸມເປັນບາງສ່ວນ, ມີຝົນຕົກຟ້າຄະນອງໃນລະດັບຄ່ອຍຢູ່ທົ່ວໄປຕື່ມອີກ ແລະ ຕົກປານກາງຫາໜັກຢູ່ເຂດແຂວງໄຊຍະບູລີ.
ພາກກາງ: ມີເມກປົກຄຸມໜາແໜ້ນ ແລະ ຍັງຈະມີຝົນຕົກຟ້າຄະນອງໃນລະດັບຄ່ອຍຢູ່ທົ່ວໄປ ແລະ ຕົກປານກາງຫາຕົກໜັກຢູ່ບາງທ້ອງຖິ່ນ ຂອງແຂວງວຽງຈັນ, ບໍລິຄຳໄຊ ແລະ ແຂວງຄຳມ່ວນ.
ພາກໃຕ້: ມີເມກປົກຄຸມເປັນສ່ວນຫລາຍ, ມີຝົນຕົກຟ້າຄະນອງໃນລະດັບຄ່ອຍເປັນບໍລິເວນກວ້າງ ແລະ ຕົກປານກາງເປັນບາງໂອກາດຢູ່ບາງທ້ອຖິ່ນແຂວງສາລະວັນ. ສ່ວນນະຄອນຫລວງວຽງຈັນ: ມີເມກປົກຄຸມເປັນສ່ວນ, ມີຝົນຕົກຟ້າຄະນອງໃນລະດັບຄ່ອຍເປັນບໍລິເວນກວ້າງ ແລະ ຕົກປານກາງຫາໜັກຢູ່ບາງບໍລິເວນ.
ຂອບໃຈຂ່າວ: ລາວພັດທະນາ